बुटवल । पुसभित्रै लुम्बिनी प्रदेशका १२ वटै जिल्लाहरूका अधिवेशन सम्पन्न गर्ने निर्णय गर्दै नेकपा एमालेको लुम्बिनी प्रदेश कमिटीको पहिलो पूर्ण बैठक सम्पन्न भएको छ ।
भदौ १६ गते राधाकृष्ण कँडेलको नेतृत्वमा प्रदेश कमिटी चयन भएपछि बिहीबार बुटवलमा पहिलो पूर्ण बैठक बसेको हो । पूर्ण बैठकलाई सम्बोधन गर्दै सचिव अर्यालले अहिलेको कमिटीले आगामी संघ, प्रदेश र स्थानीय तहको चुनाव गराउने र पार्टीको ११ औं महाधिवेशन गराउने भएकाले विशेष जिम्मेवारीका साथ काम गर्नुपर्ने जिम्मेवारी आएको बताइन् ।
उनले अधिवेशनमा उत्पन्न प्रतिस्पर्धाको मनोविज्ञानको अन्त्य गरी पार्टीलाई एकढिक्का बनाउने गरि योजना बनाउन निर्देशन दिइन् । गुटबन्दी गर्ने कसैलाई छुट नभएको उल्लेख गर्दै उनले अवैधानिक कमिटी बनाईए सूचना पाएको अर्को दिन भंग गरिने चेतावनी दिइन् । हरेकसँग विधान र नियमावलीका दस्तावेज हुनुपर्यो, कमिटीको महत्व र जिम्मेवारी नहुँदा चाहियो भन्ने काम गर्दा लैजा भन्ने कुरा अराजकता हो ।’ उनले भनिन् ।
पार्टीमा फुर्सदका बेला काम गर्ने मात्र नभएर कम्युनिस्ट पार्टीको आचरणअनुसार काम गर्ने कार्यकर्ता जन्माउनु पर्ने उनको भनाइ थियो । पार्टीका जिम्मेवारीमा बसेकाहरुको आचरण सुधार गर्नुपर्ने भन्दै उनले कम्युनिस्ट पार्टीका कार्यकर्ता विचारमा पनि स्पष्ट हुनुपर्ने बताइन् ।
बैठकले अधिवेशनको समीक्षा गर्दै सचिवालय गठन, विभागीय जिम्मेवारी बाँडफाँड, जनसंगठनको भेला, पार्टी इतिहास लेखन र स्कुल विभाग संचालन तथा कार्यालय व्यवस्थापनका विषयमा टुंगो लगाएको प्रचार विभाग प्रमुख डिआर घिमिरेले बताए ।
लुम्बिनीमा सबैभन्दा पहिले अधिवेशन भएकाले जिल्लाहरुको पनि पहिले अधिवेशन सक्नेगरी योजना बनाइएको घिमिरेले बताए ।
प्रतिक्रिया