नेपालगन्ज । स्थानीय प्रशासनले गत १६ गतेबाट नेपालगन्जमा लगाउँदै आएको कर्फ्यु र निषेधाज्ञा आज मध्यान्हबाट पूर्णरुपमा हटाएको छ।
असोज १६ गते दिउँसो १ बजेदेखि नेपालगन्जमा लगाइएको कर्फ्यु र निषेधाज्ञा आज दिउँसो १ बजेबाट पूर्णरुपमा हटाइएको हो । स्थानीय प्रशासनले गत १८ गतेबाट रातिमा कर्फ्यु र दिनमा निषेधाज्ञा लगाउँदै आएको थियो ।
नेपालगन्को जनजीवन सामान्य बन्दै गएसँगै प्रशासनले कर्फ्यु र निषेधाज्ञाको समय क्रमशः घटाउँदै लगेको थियो।
आज बाँकेका सहायक प्रमुख जिल्ला अधिकारी टोपेन्द्रबहादुर केसीले एक सूचना जारी गर्दै नेपालगन्ज सहित जिल्लामा शान्ति सुरक्षाको अवस्था सामान्य भएकाले कर्फ्यु र निषेधाज्ञा हटाएको जनाएको छ । सूचनामा शान्ति सुरक्षा कायम गर्न प्रशासनको कर्फ्यु र निषेधाज्ञाको पालना गरेकोमा नागरिक समाज, समन्वय गरिदिने धर्मगुरुहरु, राजनीतिक दल, सुरक्षाकर्मी सबैलाई आभार पनि प्रहट गरिएको छ ।
सामाजिक सञ्जालमा कुनै व्यक्तिले लेखेको स्टाटस र त्यसको जवाफमा लेखिएको कमेन्टको विषयलाई लिएर नेपालगन्जमा सद्भावविरोधी गतिविधि भएको थियो।
प्रतिक्रिया