ओमानले नेपाललाई दियो १ सय ४६ रनको लक्ष्य

काठमाडौं । आईसिसी टी-२० विश्वकप एसिया छनोटमा ओमानले नेपाललाई १४६ रनको लक्ष्य दिएको छ ।

त्रिवि क्रिकेट मैदानमा टस हारेर पहिले ब्याटिङ गरेको ओमानले निर्धारित ओभरमा ९ विकेट गुमाउँदै १ सय ४५ रन बनायो । ओमानका लागि कप्तान जाहिन मक्सुदले सर्वाधिक ३२ रन बनाए । निशान खुसीले २५ रन बनाउँदा ओपनर प्रतिक अथाव्ले २४ रनमा आउट भए ।

नेपालका करण केसीले ३ तथा सन्दीप लामिछाने र सोमपाल कामीले दुई दुई विकेट लिए । अविनाश बोहोरा र गुल्सन झाको नाममा एक एक विकेट रह्यो ।

आजै मुलपानी मैदानमा जारी खेलमा यूएईले हङकङलाई १ सय ७७ रनको लक्ष्य दिएको छ । टस हारेर ब्याटिङ गरेको यूएईले निर्धारित ओभरमा ६ विकेट गुमाएर १ सय ७६ रन बनाएको हो ।

समूह ‘ए’ मा रहेका दुवै टिम सेमिफाइनल प्रवेश गरिसकेका छन् । यो खेलले समूह विजेता र उपविजेताको टुंगो लाग्नेछ । समूहका अघिल्ला खेलमा दुवै टोलीले सिंगापुर र मलेसियालाई पराजित गरेका थिए ।

आज हुने समूह एको अन्तिम खेलमा समूह मलेसिया र सिंगापुरबीच प्रतिस्पर्धा हुँदै छ । प्रतियोगिताबाट बाहिरिसकेका दुवैका लागि सुखद अन्त्य गर्ने लक्ष्यमा छन् । आजै बहराइन र कुवेत पनि आमनेसामने हुँदै छन् । यो खेलपछि मात्र समूह बीबाट अन्तिम चारमा पुग्ने टिमको टुंगो लाग्नेछ ।