राष्ट्रियसभा सदस्य निर्वाचन माघ ११ गते, दल दर्ता मंसिर २४ देखि २९ भित्र

काठमाडौं । निर्वाचन आयोगले राष्ट्रियसभा सदस्य निर्वाचनको दल दर्ताको कार्यतालिका सार्वजनिक गरेको छ ।

सरकारले आगामी माघ ११ गते निर्वाचन मिति तय गरेसँगै आयोगले निर्वाचन सम्पन्न गर्ने प्रयोजनका लागि तयारी सुरु गरेको हो । आयोगले आज जारी गरेको विज्ञप्ति अनुसार निर्वाचनका लागि दल दर्ता यही मंसिर २४ गतेदेखि २९ गतेसम्म हुने भएको छ । त्यसअघि मंसिर २२ गते निर्वाचनमा भाग लिने राजनीतिक दल दर्ताका लागि सूचना प्रकाशन हुनेछ ।

आयोगले पुस १ गते राजनीतिक दलहरुलाई निर्वाचन चिन्ह प्रदान गर्ने छ भने पुस ४ गते दलको स्वीकृत दलको नामावली राजपत्रमा प्रकाशनार्थ पठाउनेछ ।

पुस १६ गते निर्वाचन अधिकृतको नियुक्ति, सोही दिन सात वटै प्रदेश निर्वाचन कार्यालयमा निर्वाचन अधिकृतको कार्यालय स्थापना गर्ने कार्यक्रम रहेको आयोगले जनाएकोछ । पुस २० गतेदेखि पुस २९ गतेसम्म निर्वाचन अधिकृतको कार्यालयमा निर्वाचन कार्यक्रम सञ्चालन हुनेछ।

माघ ११ गते बिहान ९ बजेदेखि दिउँसो ३ बजेसम्म मतदान संचालन हुने आयोगले जनाएको छ ।