भुटानी शरणार्थी प्रकरण : पूर्व गृहमन्त्री खाँणको निवेदनमाथि आज सुनुवाइ हुँदै

काठमाडौं । नक्कली शरणार्थी प्रकरणमा पुर्पक्षकालागि कारगारमा रहेका पूर्वगृहमन्त्री बालकृष्ण खाँणले दिएको निवेदनमाथि उच्च अदालत पाटनमा आज सुनुवाइ हुँदैछ । यसअघि भएको सुनुवाइमा दुई न्यायाधीशबीच राय बाझिएकाले तेस्रो न्यायाधीशकोमा पेस गरेर सुनुवाइ हुन थालेको हो ।

आज सुनुवाइ गर्ने न्यायाधीसले यसअघिका दुई मध्ये जुन न्यायाधीशको रायमा समर्थन गर्नेछन् त्यही आदेश कार्यान्वयन हुने बताइएको छ । अदालती बन्दोबस्तीको नियम अनुसार यस अघिका दुई न्यायाधीशले भन्दा आज सुनुवाइमा परेका न्यायाधीसको फरक राय आएमा भने खाँणले दिएको निवेदन सुनुवाइका लागि सर्वोच्च अदालतको एकल इजलासमा पुग्नेछ ।

१५ मंसिरमा उच्च अदालत पाटनले नक्कली भुटानी शरणार्थी प्रकणमा पूर्वमन्त्री टोपबहादुर रायमाझी, तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राई, आङटावा शेर्पासहित ९ जनालाई थुनामै राख्न आदेश दिएको थियो ।

उच्च अदालतले खाणका पीए नरेन्द्र केसी र शमशेर मियाँलाई १० लाख, टेकनाथ रिजाल, हरिभक्त महर्जन र रामशरण केसीलाई १५ लाख, सन्दीप रायमाझीलाई ३० लाख लिएर धरौटीमा छाड्ने आदेश गरेको छ । लक्ष्मी महर्जन, टंककुमार गुरुङ, केशव तुलाधर र आशिष बुढाथोकीलाई साधारण तारेखमा छाड्न आदेश भएको थियो ।