नेपालगन्ज । नौबस्ता बाल सुधार गृहमा रहेका बालबन्दीबीचको तनाव शान्त भएलगत्तै उनीहरुलाई जाडो लुगावापतको नगद रुपैया वितरण गरिएको छ । पटक पटक एक आपसमा झडप र तोडफोड गर्दै आएका बालबन्दीहरुबीच तीन दिन अघि पनि झडप भएको थियो ।
प्रमुख जिल्ला अधिकारी श्रवणकुमार पोखरेलले नौवस्ता बाल सुधार गृहमा पुगेर बाल सुधार गृहमा रहेका एक सय २ जनालाई जाडो लुगा वापतको एक हजार नौ सय २१ रुपैया प्रदान गरेका हुन् । दैनिक सिधाबाहेक बन्दीले पाउने जाडो र गर्मीमा लुगावापत नगद रकम प्रदान गरिएको प्रजिअ पोखरेलले बताए ।
तीन दिनअघि बालबन्दीको बीचमा भएको झडपले तनावग्रस्त बनेको नौबस्ता बाल सुधार गृह शान्त भए लगत्तै उनीहरुलाई जाडोमा पाउने पैसा दिइएको छ । उनीहरुको मनोविज्ञानको अध्ययन गर्न हातमै नगद प्रदान गर्ने कार्यक्रम राखिएको बाल सुधारगृह स्रोतले जनाएको छ ।
पुस १५ गते भएको झडपपछि बाल सुधार गृहबाट १४ जना फरार भएका छन् । गत असोज ४ गते जयन्दु बाल सुधारगृहमा भएको झडप पछि फरार ३ जना अझै फेला परेका छैनन् ।
त्यहाँ रहेकाहरुलाई एक ठाउँमा नराखेर अलगअलग राखिएको प्रमुख जिल्ला अधिकारी पोखरेलले जानकारी दिए ।
प्रतिक्रिया