नेपालगञ्ज। नेकपा एमालेका महासचिव शंकर पोखरेलले मुलुकको विकास र समृद्धिका लागि बलियो राजनीतिक शक्ति आवश्यक पर्ने बताएका छन्।
प्रेस चौतारी नेपाल बाँकेले नेपालगञ्जमा सोमबार दिउसो आयोजना गरेको पत्रकारमा बोल्दै महासचिव पोखरेलले मुलुकको विकास र सम्बृद्धिको लागि बलियो राजनीतिक शक्तिलेमात्र निकास दिनसक्ने कुरामा जोड दिए।
‘नयाँ पपुलारिटीको रूपमा आएका शक्तिले केही गर्न सक्दैनन्। मुलुकमा केही गर्ने हो भने बलियो राजनीतिक शक्तिले मात्र गर्न सक्छ’, उनले भने।
वर्तमान सरकारका कारण मुलुक बैदेशिक शक्ति केन्द्रहरुको क्रिडास्थल भएको आरोप समेत लगाउदै गठबन्धन सरकारले बजेटरी प्रणाली भन्दा बाहिर गएर आफूले गर्नुपर्ने काम दूतावासमा सुम्पेको विषयमा चिन्ता ब्यक्त गरे।
उनले भने, ‘आइएनजियोलाई समेत निगरानी गर्नु पर्ने बेलामा बजेटरी प्रणालीलाई चुनौति दिँदै आफ्नो लाचारी पन प्रस्तुत गरेर सरकार र राज्यले गर्ने काम दूतावासलाई सुम्पनु अत्यन्त निन्दाको काम भएको छ।’
वर्तमान सरकार र सत्ता गठबन्धनले संबिधानको रक्षा गर्न नसकेको र अतिबादलाई प्रबद्धन गर्ने काम गरेको बताउदै एमालेको पुष्पलाल मध्यपहाडि सम्बृद्धिको यात्राले जनतामा केही आशा थपेको उल्लेख गर्दै यो यात्रा एमालेको मात्र नभएको समग्र राष्ट्रको संकल्प यात्रा भएको ठोकुवा गरे।
उनले चाँडैनै हुलाकी सडकको यात्रा तय गर्ने एमालेको तयारी रहेको सो अवसरमा जानकारी दिए। फरक प्रसंगमा एमाले महासचिव पोखरेलले एमाले समानुपातिकतर्फ जनताले अत्याधिक रुचाएको पार्टी भएकोले मिसन ८४ का लागि तयारी गरेको तर, सत्तामा सहभागि हुने तत्काल कुनै सम्भावना नभएको बताए।
प्रतिक्रिया