काठमाडौँ । नेकपा एकीकृत समाजवादीको तर्फबाट सरकारमा सहभागी मन्त्रीहरुले पार्टीलाई रिपोर्ट कार्ड बुझाउनुपर्ने भएको छ । सोमबार बसेको सचिवालयको बैठकले सरकारमा रहेको मन्त्रीहरुको प्रगतिविवरण माग्ने निर्णय गरेपछि मन्त्रीहरुले पार्टीलाई रिपोर्ट कार्ड(प्रगतिविवरण) बुझाउनु पर्ने भएको हो ।
सरकारमा पार्टीका तर्फबाट सहभागी मन्त्रीहरुले आजसम्म के कस्ता कामहरु गरे ? उनीहरुको काममा कस्तो प्रगति भएको छ ? त्यसको विवरण पार्टीमा बुझाउन बैठकले निर्देशन गरेको एकीकृत समाजवादी पार्टीका प्रवक्ता जगन्नाथ खतिवडाले जानकारी दिए ।
सरकारमा एकीकृत समाजवादीबाट भौतिक पूर्वाधार तथा यातायात मन्त्री प्रकाश ज्वाला र कृषि मन्त्री बेदुराम भुसाल सहभागी छन् ।
बैठकले राष्ट्रिय सभामा उठेका गठबन्धनका उम्मेदवारहरू जिताउन पार्टी पंक्तिलाई आह्वान गर्ने निर्णय पनि गरेको खतिवडाले बताए । प्रवक्ता खतिवडाका अनुसार पार्टीले भारतीय विदेशमन्त्री लगायत विभिन्न देशसँग भएका सहमतिहरु सरकारसँग माग गर्ने निर्णय गरेको छ ।
त्यसैगरी माघ ८ गते ११ बजे बस्नेगरी महाधिवेशन मस्यौदाबारे छलफल गर्न पार्टीको विधान मस्यौदा समितिको बैठक बोलाउने निर्णय गरेको उनले बताए ।
प्रतिक्रिया