खजुरा । लुम्बिनी प्रदेश खेलकुद परिषदका सदस्य सचिव जयप्रकाश भट्टराईले बाँकेको खजुरा स्थित मिनी फुटवल रङ्गशाला र शुक्र भलिवल रङ्गशालाको अवलोकन गरेका छन् ।
आज मध्यान्ह सदस्य सचिव भट्टराई राष्ट्रिय खेलकुद परिषद सदस्य दिपेन्द्र बिष्ट, प्रदेश खेलकुद परिषद सदस्य नरेन्द्र थापा र बाँके जिल्ला खेलकुद विकास समितिका अध्यक्ष संदीपजङ्ग शाह सहित खजुराका २ रङ्गशाला अवलोकनका लागि पुगेका थिए ।
सो अवसरमा स्थानीय खेलकुद सम्बद्ध पदाधिकारीहरुसँग छलफल गर्दै उनले खजुरा खेलाडी जन्माउने उदगम थलो भएको बताए । उनले भौतिक निर्माणमा प्रदेश खेलकुद परिषदसँग बजेट नभएपनि खेल गतिबिधि संचालनका लागि प्रदेशबाट लगानी हुन सक्ने प्रतिबद्धता ब्यक्त गरे । उनले नितीगतरुपमा प्रदशेलाई अधिकार दिइएपनि कार्यान्वयन भइनसकेको उल्लेख गर्दै खजुरा क्षेत्रमा खेलकुदका पूर्वाधार निर्माणमा आफ्नो सहयोग रहने बताए ।
खजुराको डी गाउँ स्थित मिनी रङ्गशालामा सदस्यसचिव भट्टराईलाई स्थानीय न्यु डाँफे स्पोर्टस क्लवले ध्यानाकर्षण पत्र बुझाएको थियो ।
सदस्य सचिव भट्टराईले आजै खजुराको २ नम्बर वार्डमा रहेको शुक्र भलिवल रङ्गशालाको पनि अवलोकन गरेका थिए । सो अवसरमा उनलाई लुम्बिनी प्रदेश खेलकुद परिषदका पूर्व सदस्य सचिव भीम ओलीले आठौं राष्ट्रिय खेलकुदका बेला बनेका पूर्वाधारहरुको मरमत सम्भार र संचालनमा ध्यान दिन सदस्यसचिव भट्टराईको ध्यानाकर्षण गराए ।
प्रतिक्रिया