नेपालगन्ज । बाँके र बर्दियाका धार्मिक तथा पर्यटकीय क्षेत्रको प्रवद्र्धन गर्न भन्दै गरिएको नेपालगन्ज साइकल फेस्टिवल अन्तर्गत ‘टुर दि ठाकुरद्वारा’ को लागि आज नेपालगन्जदेखि बर्दियाको ठाकुरद्वारासम्मको लागि साइकल यात्रा सुरु गरिएको छ । नेपालगन्ज साइक्लिङ क्लवको आयोजनामा नेपालगन्जको बागेश्वरी मन्दिरबाट आज विहान आठ बजे साइकल यात्रा शुरु भएको हो ।
विश्व साइकलयात्री पुष्कर शाह, बाँकेका प्रमुख जिल्ला अधिकारी श्रवणकुमार पोखरेल, नेपालगञ्ज उद्योग बाणिज्य संघका अध्यक्ष टंकबहादुर धामीलगायतको उपस्थितिमा नेपालगन्ज उपमहानगरपालिकाका मेयर प्रशान्त विष्टले ‘टुर दि ठाकुरद्वारा’को उद्घाटन गरे ।
विगत ६ वर्षदेखि संचालन हुँदै आएको ‘टुर दि ठाकुरद्वारा’ साइकलयात्राले नेपालगन्जदेखि ठाकुरद्वारासम्मको एक सय तीन किलोमिटरको दुरी पार गर्ने छ । यात्रा परिधी भित्र पर्ने धार्मिक तथा पर्यटकीयस्थलमा पुगेर साइकलयात्रीले त्यसको प्रचार प्रसार गर्ने गर्दछन् ।
साइकलयात्रामा भारतका १५ जनासहित धरानदेखि महेन्द्रनगरसम्मका २ सय २५ जनाको सहभागीता रहेको क्लवका निवर्तमान अध्यक्ष तथा ‘टुर दि ठाकुरद्वारा’का कार्यक्रम संयोजक सतिश निरौलाले जानकारी दिए ।
क्लवका अध्यक्ष प्रदीप सापकोटाले बाँके र बर्दियाका धार्मिक र पर्यटकीय स्थलको प्रचार प्रसार गर्न थालिएको ‘टुर दि ठाकुरद्वारा’ सम्पन्न गर्न २७ लाख खर्च हुने अनुमान गरिएको बताए ।
साइकलयात्रा भोली सकिने छ । यात्रामा चिकित्सक, उद्योगी व्यापारी, राजनीतिज्ञको पनि सहभागिता रहेको छ ।
प्रतिक्रिया