नेपालगन्ज । बाँकेमा नक्कली औषधी पसल फेला परेको छ । जिल्लाको डुडुवा गाउँपालिकाको वडा न. ६ चौधरीपुर्वाबाट एक जना नक्कली औषधि बिक्रेतालाई बाँके प्रशासनले पक्राउ गरि नक्कली औषधि पसल शिल गरेको छ ।
औषधी पसल संचालन गर्ने कुनैपनि कागजाद र अनुमति नलिई लामो समयदेखि औषधी पसल गर्दै आएका विकास लखेरलाई नियन्त्रणमा लिँदै बाँके प्रशासनले लखेरले चलाउँदै आएको औषधी पसललाई शिलबन्दी गरेको जनाएको छ । लखेरसँग औषधि बिक्री गर्ने योग्यताको प्रमाण पत्र नभएको र पसल प्रचलित कानून कहिँकतै दर्ता समेत नभएको बाँकेका प्रमुख जिल्ला अधिकारी श्रवणकुमार पोखरेलले बताए ।
पोखरेलका अनुसार उक्त पसलमा रहेका ७५ प्रतिशत बढी औषधी म्याद नाघेको फेला परेको छ । कतिपय औषधीमा आफैले कलमबाट म्याद सच्याइएको(ओभरराईड) गरिएको पाइएको प्रजिअ पोखरेलले बताए ।
बरामद भएका केही औषधीहरु नेपालमा प्रतिबन्धित रहेको पनि उनले बताए । प्रतिबन्धित भिगो टृप्पल एक्स , डर्मिकेम जस्ता नेपालमा उपयोग गर्न समेत निषेध गरिएको औषधी सो पसलमा बरामद भएको उनले बताए ।
लखेरले स्थानीयलाई आफु डाक्टर भएको भन्दै बिरामी जाँच्ने र औषधी दिने समेत कार्यसमेत गर्ने गरेको स्थानीयले बताएका छन् ।
औषधी ब्यवस्था बिभाग शाखा कार्यालय नेपालगन्जसँग समन्वय गरि नक्कली बिक्रेता लखेरलाई औषधी बिक्री बितरण सम्बन्धी प्रचलित कानून बमोजिम कारवाहि गरिने प्रमुख जिल्ला अधिकारी पोखरेलले बताए ।
प्रतिक्रिया