बाँके प्रहरीबाट ५ लाख बढीको अबैध ब्रोईलर कुखुराको चल्ला बरामद

नेपालगन्ज । बाँके प्रहरीले बाँकेका बिभिन्न स्थानबाट अबैधरुपमा भारतबाट नेपाल भित्रिएको ठुलो परिमाणको कुखुराको चल्ला बरामद गरेको छ । जिल्लाको नेपालगन्ज उपमहानगरको बिभिन्न स्थानबाट प्रहरीले ५ लाख बढी मूल्य बराबरको अबैध चल्ला बरामद गरेको हो ।

अबैध रुपमा कुखुराको चल्ला भित्रिएको भन्ने बिशेष सूचनाको आधारमा खटिएको प्रहरी टोलीले नेपालगन्ज २० राझाँ, नेपालगन्ज १८ भुजई गाँउ र डुडुवा ६ हिरमिनियाबाट भारतबाट अबैध रुपमा भन्सार छली चोरी निकासी पैठारी गरि नेपाल भित्राइएको ५९ पेटी (५९००गोटा) ब्रोईलर कुखुराको चल्ला बरामद भएको प्रहरीले जनाएको छ । प्रहरीका अनुसार बरामद भएको चल्लाको अन्दाजी मुल्य ५ लाख ९० हजार र ढुवानीमा संलग्न अटोको अन्दाजी मुल्य ६ लाख ५० हजार सहित १२ लाख ४० हजार बराबरको अबैध कुखुराको चल्ला ढुवानीमा संलग्न अटो र मानिस सहित आवश्यक कारवाहीको लागी पशु क्वारेन्टाईन कार्यालय नेपालगन्ज पठाइएको छ ।

साथै प्रहरीले आजै नेपालगन्ज १८ कारकाँदोबाट अबैध रुपमा भारतबाट ल्याएको माछा ८ बरामद गरी आवश्यक कारवाहीको लागी पशु क्वारेन्टाईन कार्यालय नेपालगंज बाँकेमा पठाएको पनि जनाएको छ ।