नेपालगन्ज । उच्च अदालत तुलसीपुर नेपालगन्ज इजलासले चालु आर्थिक वर्ष २०८०/०८१ को साउन महिनादेखि बैशाख मसान्तसम्म लक्ष्य राखिएको संख्याको हाराहारीमा मुद्दा फर्छ्योट गरेको छ । उक्त अवधिभित्र अदालतले १ हजार ४ सय ४६ मुद्दा फर्छ्योटको गर्ने लक्ष्य राखेकोमा १ हजार ४ सय २१ वटा मुद्दा फछ्र्यौट गरेको हो ।
अदालतले आज पत्रकार सम्मेलन गर्दै १० महिनाको अवधिमा लक्ष्यको नजिकै मुद्दा फर्छ्योट गर्न सकिएको जनाएको छ । पत्रकार सम्मेलनमा जानकारी दिइए अनुसार अदालतले साउन महिनामा ६८, भदौंमा १ सय १४, असोजमा ७२, कात्तिकमा ३३, मंसिरमा ८४, पुसमा १ सय ३, माघमा २ सय ३९, फागुनमा २ सय ८९, चैतमा २ सय २२ र बैशाखमा १ सय ९७ मुद्दा फर्छ्योट गर्न सकेको नेपालगन्ज इजलासका रजिस्ट्रार सरोजनिधि वाग्लेले जानकारी दिए । उनले अदालतले वार्षिक रुपमा १ हजार ८ सय ३२ वटा मुद्दा फर्छ्योट गर्ने लक्ष्य राखेकोमा हालसम्म ९८.२७ प्रतिशत प्रगति भएको बताए । उनका अनुसार अदालतमा सबैभन्दा बढी रिट निवेदन ३ सय ७८ वटा दर्ता भएकोमा २ सय ८० वटा फर्छ्योट भएका छन् ।
यस्तै लागु औषध सम्बन्धी २ सय ५१ वटा मुद्दा दर्ता भएकोमा १ सय ४५ वटा फर्छ्योट भएका छन । अंश सम्बन्धी १ सय ७५ वटा मुद्दा दर्ता भएकोमा ७९ वटा मुद्दा फर्छ्योट भएका छन् । यसैगरी करणी सम्बन्धी १ सय ५४ वटा मुद्दा दर्ता भएकोमा ८८ वटा फर्छ्योट भएका छन भने चोरी सम्बन्धी १ सय ८ वटा मुद्दा दर्ता भएकोमा ५५ वटा फर्छ्योट वाग्लेले बताए ।
नेपालगन्जमा कर्तव्य ज्यान सम्बन्धी ९५ वटा दर्ता भएकोमा ६६ वटा फर्छ्योट भएका छन । ज्यान मार्ने उद्योग अन्तर्गत ६७ वटा दर्ता भएकोमा ४१ वटा मुद्दा फर्छ्योट भएका छन् भने सम्बन्ध विच्छेद सम्बन्धी ४७ वटा दर्ता भएकोमा २७ वटा मुद्दा फर्छ्योट भएका छन । त्यस्तै सो अवधिसम्म अन्य १ हजार २ सय २४ वटा मुद्दा दर्ता भएकोमा ५ सय ४० वटा मुद्दा फर्छ्योट भएको रजिस्ट्रार वाग्लेले बताए ।
पत्रकार सम्मेलनमा अदालतका मुख्य न्यायाधीश चन्द्रबहादुर सारुले अदालतमा धेरै कुरा आफूहरूले सुधार ल्याएको दाबी गरे ।वार्षिक लक्ष्य अनुसार अदालतले मुद्दा फर्छ्योट गरेको उल्लेख गर्दै उनले अदालतमा डिसिएम पद्धति लागु भएपछि काममा धेरै सहजता आएको बताए ।
प्रतिक्रिया