पोलियोविरुद्धको आइपीभी खोप : राप्तीसोनारीमा ४० प्रतिशतले खोप लगाउँदा खजुरामा १३ प्रतिशतलाई खोप लगाइयो

नेपालगन्ज । बांकेमा आजदेखि पोलियोविरुद्धको आइपीभी खोप अभियान सञ्चालन गरिएको छ । राष्ट्रिय खोप अन्तर्गत बाँकेमा २०७३ बैशाखदेखि २०७५ असोज महिनासम्म जन्मिएका बालबालिकालाई खोप दिइएको छ ।

स्वास्थ्य कार्यालय, बाँकेका फोकलपर्सन नरेश श्रेष्ठका अनुसार, जिल्लामा ३५ हजार ६ सय ६ बालबालिकालाई लक्षित गर्दै खोप अभियान सुरु गरिएकोमा आज ८ हजार ७३ जनाले खोप लगाएका छन् । जेठ १८ गतेसम्म अभियान चलाउने र छुटेको पाइएमा २४ गतेसम्म नै खोप लगाउने तयारी गरिएको फोकलपर्शन श्रेष्ठले बताए ।

खोप अभियानको पहिलो दिन सबै भन्दा बढी राप्ती सोनारीमा र सबै भन्दा कम खजुरामा बालबालिकाहरु खोप लगाउन आएको उनले जानकारी दिए । उनका अनुसार राप्ती सोनारीमा लक्षित संख्यामा ४० प्रतिशत बढी र खजुरामा १३ प्रतिशत बालबालिका खोपकेन्द्रमा खोप लगाउन आएका थिए ।

जिल्लामा २ सय ४३ खोप केन्द्रमा एक-एक जना खोप लगाउने व्यक्ति र ४ सय ८६ जना स्वयंसेवक परिचालन गरिएको छ । आइपीभी खोप १४ हप्ता र ९ महिना उमेरका बालबालिकालाई लगाइन्छ । यो उमेरमा छुटेमा ५ वर्षभित्र ४(४ महिनाको फरकमा खोप लगाइन्छ ।