नेपालगन्ज । भेरी अस्पताल नेपालगन्जको मेडिकल सुपरिन्टेन्डेन्डमा डा.प्रकाश थापा तोकिएका छन् । स्वास्थ्य मन्त्रालयले अस्पतालको निमित्त प्रमुख मेडिकल सुपरिटेन्डेन्टको जिम्मेवारी डा. थापालाई ताकेको हो ।
अस्पतालका प्रमुख मेडिकल सुपरिटेन्डेन्ट डा. पवनजंग रायमाझीलाई मन्त्रालयले हटाएर भेरी अस्पतालमै कार्यरत डा.थापालाई निमित्त प्रमुख मेडिकल सुपरिन्टेन्डेन्टको जिम्मेवारी दिएको हो । यस अघि जसपा अध्यक्ष उपेन्द्र यादवले स्वास्थ्यमन्त्रीबाट बिदा हुँदाहुँदै डा. राजन पाण्डेलाई मेसु नियुक्त गरेपनि नियुक्तिको २४ घण्टा नहुँदै नयाँ बनेका स्वास्थ्यमन्त्री प्रदीप यादवले बदर गरिदिएका थिए ।
वरिष्ठ कन्सल्टेन्ट अर्थोपेडिक सर्जन थापा दशौं तहका चिकित्सककारुपमा अस्पतालमा कार्यरत छन् । कोरोनाको महामारीमा डा. थापाकै नेतृत्वमा त्यसको व्यवस्थापन, उपचार र निदानमा प्रभावकारी कार्य गरेको भन्दै उनको प्रशंसा हुने गरेपनि पछिल्लो समय सरकारी अस्पतालमा भन्दा उनी संलग्न निजी अस्पताल मल्हमपट्टी अस्पतालमा बढी समय दिने गरेको भन्दै डा थापाको आलोचना हुने गरेको छ ।
प्रतिक्रिया