काठमाडौं । नेपालगन्ज स्थित भेरी अस्पतालमा सिकलसेल एनिमियाको उपचारका लागि छुट्टै वार्ड स्थापना गरिने भएको छ । पश्चिम तराइका थारु समुदायमा बंशाणुगत स्वास्थ्य समस्याको रुपमा रहेको सिकलसेल एनिमियाको उपचारका लागि भेरी अस्पतालमा छुट्टै वार्ड स्थापना हुने भएको हो ।
स्वास्थ्य तथा जनसंख्यामन्त्री प्रदीप पौडेलले मन्त्रीस्तरीय निर्णयबाट थारु समुदायको प्रमुख स्वास्थ्य समस्याको रुपमा रहेको सिकलसेल एनिमियाको उपचारका लागि छुट्टै वार्ड स्थापना गर्ने निर्णय भएको हो ।
थारु समुदायका धेरै व्यक्तिमा समस्या देखिएपनि यसको उपचारका लागि पर्याप्त व्यवस्था हुन सकेको थिएन । मन्त्रीस्तरीय निर्णयबाट भेरी अस्पताल नेपालगन्जमा हेमोग्लोविनोप्याथी वार्ड स्थापना हुने भएको छ ।
स्वास्थ्य तथा जनसंख्या मन्त्रालयका प्रवक्ता डा. प्रकाश बुढाथोकीका अनुसार थारु समुदायलाई पायक पर्ने र अधिक बसोबास रहेको क्षेत्रलाई लक्षित गरी भेरी अस्पतालमा छुट्टै वार्ड स्थापनाको निर्णय गरिएको हो ।
स्वास्थ्य तथा जनसंख्या मन्त्रालयको एक आँकडामा थारु समुदायमा वंशाणुगत स्वास्थ्य समस्याका रुपमा रहेको सिकलसेल एनिमियाबाट यो समुदायका झण्डै १२ प्रतिशत नागरिक प्रभावित भएको उल्लेख छ ।
पश्चिम तराइको बाँके, बर्दिया, कैलाली कञ्चनपुरलगायतका भू—भागमा बसोबास गर्ने थारु समुदायका नागरिकहरु सिकलसेल एनिमियाबाट बढी प्रभावित पाइएको छ ।
विपन्न नागरिक औषधि उपचार कोष निर्देशिका बमोजिम सिकलसेल एनिमियाका बिरामीहरुलाई शल्यक्रिया, औषधि तथा औषधिजन्य सामग्री, थप निदानात्मक सेवा शय्या सेवा शुल्क आदिको लागि १ लाख रुपैयाँसम्म खर्चको व्यवस्था गरिने मन्त्राललयले जनाएको छ ।
प्रतिक्रिया