नेपालगन्ज । यही मंसिर २८ गते हुने भनिएको नेपाल पत्रकार महासंघको निर्वाचनमा भाग लिन सदस्यता बापतको सम्पूर्ण शुल्क भुक्तानी गर्न अनिवार्य गराइएको छ । महासंघका पदाधिकारीहरुको म्याद सकिएको ८ महिनापछि हुने भनिएको निर्वाचनका लागि मंसिर १४ गते भित्र सदस्यता बापतको बाँकी बकौता भुक्तानी गर्न भनिएको छ ।
केन्द्रको सर्कलर भन्दै पत्रकार महासंघ बाँके शाखाले आज एक सूचना प्रकाशित गर्दै मंसिर १४ गते मध्यान्ह १२ बजेभित्र २०७८ साल यताको सदस्यता शुल्क बुझाएर सदस्यता नविकरण गर्न र नयाँ सदस्यता पाएकाहरुले सदस्यता बापतको रकम दाखिला गर्न भनेको छ । महासंघको सूचनामा सदस्यता नविकरण नभएका र सदस्यता शुल्क नबुझाएका सदस्यहरुले मतदान गर्न नपाउने उल्लेख गरिएको छ ।
यसअघि नविकरण भएकाहरुको हकमा रसिद हेरि बाँकी अवधिको सदस्यताको नविकरण शुल्क बुझाउन सूचनामा जनाइएको छ ।
महासंघको बिधान अनुसार नयाँ सदस्यहरुले प्रवेश वर्षको २ हजार र त्यसपछिको नविकरण बा पतवर्षको १ हजार सदस्यता शुल्क बुझाउनु पर्दछ । बिधानमा लगातार दुई वर्षसम्म नवीकरण नगर्ने सदस्यको सदस्यता स्वतः खारेज हुने व्यवस्था रहेपनि महासंघमा निर्वाचन हुने सालमा एकै पटक सदस्यता नविकरण गर्ने प्रचलन रहँदै आएको छ ।
प्रतिक्रिया