नेपालगन्ज । राप्ती नदीको तट सिधनियाघाटमा मृत्यु पश्चतको दाहसंस्कार स्थल बैकुण्ठधाम निर्माणका लागि आयोजना गरिएको वैकुण्ठधाम आध्यात्मिक महोत्सवबाट ३ करोड बढी संकलन भएको छ । महोत्सवको मुल आयोजक सिधनियाघाट वैकुण्ठधामले आज पत्रकार सम्मेलन गरेर महोत्सवको आयव्यय विवरण सार्वजनिक गर्दै ३ करोड बढी संकलन भएको जानकारी दिएको हो ।
वैकुण्ठधाम आध्यात्मिक महोत्सव मूल समारोह समितिले कात्तिक २२ देखि ३० गतेसम्म नेपालगन्जको रामलिला मैदानमा आयोजना गरेको महोत्सवबाट तीन करोड तीन लाख १५ हजार चार रुपैया संकलन भएको र ७५ लाख ७ हजार ३७७ खर्च भई २ करोड २८ लाख ७ हजार ६२७ रुपैयाँ बचत भएको समितिका कोषाध्यक्ष कृष्णप्रसाद श्रेष्ठले जानकारी दिए ।
कोषाध्यक्ष श्रेष्ठका अनुसार, एक करोड ४५ लाख ९७ हजार ४ सय २८ रुपैया नगद प्राप्त भएको छ भने ६० लाख ४४ हजार ४७ रुपैया घोषणा भएपनि दाताहरुले भुक्तानि गरेका छैनन् । त्यसैगरि२१ लख ६६ हजार १ सय ५२ रुपैयाको बिभिन्न मितिका चेक प्राप्त भएको छ । चेक क्रमश खातामा जम्मा गरिने श्रेष्ठले बताए ।
नेपालगन्जका नगर प्रमुख प्रशान्त विष्टले डुडुवा गाउँपालिका वडा नं. ४ मा एक कठ्ठा र नेपालगन्ज उपमहानगरपालिका वडा नं. १८ का वडा अध्यक्ष दीपक बर्माले नेपालगन्ज–१९ मा २६ धुर जग्गा दान गरेको उनले बताए ।
पत्रकार सम्मेलनमा बोल्दै मूल समारोह समितिका संयोजक डा. सुरेशकुमार कनोडियाले अझै दुई करोड रुपैया उठाउने लक्ष्यका साथ छलफल भइरहेको बताए । उनले महोत्सव सम्पन्न गर्न प्रत्येक्ष र अप्रत्यक्ष सहयोग गर्ने सबैलाई धन्यवाद दिए । महोत्सव र वैकुण्ठधाम निर्माण अभियानलाई आलोचना र कडा टिप्पणी गर्नेहरुलाई पनि धन्यवाद दिएका छन् । ‘वैकुण्ठधाम र महोत्सवलाई लिएर आलोचना, बिरोध र कडा कुरा लेख्नेहरुलाई पनि धन्यवाद छ,’ उनले भने, ‘उनीहरुका कारण आफु र सिङ्गो टिम अझै सजक र सक्रिय हुन प्रेरणा मिल्यो ।’
संयोजक कानोडियाले आजैका मितिबाट महोत्सव सम्पन्न गर्नका लागि गठन गरिएका ११० उपसमिति र सचिवालयलाई विघटन गरिएको जानकारी दिए । उनले उपसमितिमा रहेर अहोरात्र खट्ने संयोजक र सदस्यहरुलाई पनि धन्यवाद दिँदै आगाामी दिनमा पनि सहकार्य र सहयोगको अपेक्षा गरे । उपसमिति विघटन भएपनि आफुमाथि अझै ठुलो जिम्मेवारी आएको बताउँदै उनले वैकुण्ठधाम निर्माण नहुँदासम्म आफुले बिश्राम नलिने प्रतिबद्धता जनाए ।
प्रतिक्रिया