भैरहवा । राष्ट्रिय स्वतन्त्र पार्टी (रास्वपा)का सभापति एवं पूर्वगृहमन्त्री रवि लामिछाने भैरहवा आई पुगेका छन् । बुटवलस्थित सुप्रिम सहकारी संस्थाको बचत रकम अपचलन अभियोगमा लामिछानेलाई अभियुक्त बनाइएपछि जिल्ला अदालत रूपन्देहीमा हाजिर हुन भैरहवा आई पुगेका हुन् । उनी त्रिभुवन अन्तर्राष्ट्रिय विमानस्थल हुँदै बुद्ध एयरको विमानमार्फत मंगलबार दिउँसो भैरहवा आई पुगेका हुन् ।
सभापति लामिछानेले नेता कार्यकर्तासँग भेटघाट गरेको पार्टीका युवा नेता जीत बहादुर गुप्ता (शेखर) ले बताए । रास्वपा सिद्धार्थनगरका निवर्तमान सभापति सुमन न्यौपानेका अनुसार भैरहवाको देवकोटाचोकस्थित मेरिगोल्ड होटलमा उनी बास बस्नेछन् । आज भैरहवा आएका लामिछाने बुधबार (भोली) अदालत हाजिर हुने रास्वपाका एक नेताले बताए ।
रविसहित ४२ जनालाई अभियुक्त बनाउँदै रूपन्देही जिल्ला अदालतमा आइतबार मात्रै मुद्दा दर्ता गरिएको थियो । सुप्रिम सहकारीको १४ करोड २९ लाख रुपैयाँभन्दा बढी रकम गोर्खा मिडिया नेटवर्क प्रालिमा गएको खुलेको थियो । जसमध्ये दुई करोड रुपैयाँ प्रक्रिया पूरा नगरी लामिछानेको नाममा ऋण गएको उल्लेख थियो ।
रविसहितका आरोपीविरुद्ध मुलुकी फौजदारी अपराध संहिताको ठगी कसुर र संगठित अपराधको मुद्दामा सजाय माग गर्दै मुद्दा दर्ता भएको छ । यसअघि सहकारी ठगी आरोपमा कास्की र काठमाडौं जिल्ला अदालतबाट लामिछाने क्रमः ६५ लाख र ६० लाख रुपैयाँ धरौटीमा छुटेका थिए ।
प्रतिक्रिया