ओली र देउवाको सन्देश सुनेपछि जसपाले अध्यादेशबारे निर्णय गर्दै

काठमाडौं । सरकारले प्रतिनिधिसभामा पेश गरेका ६ वटा अध्यादेशबारे निर्णय लिन जनता समाजवादी पार्टी नेपालका अध्यक्ष उपेन्द्र यादव छलफलमा जुटेका छन्।

उनी उपाध्यक्ष राजकिशोर यादवसहितका नेताहरूसँग अध्यादेशबाट निर्णय लिन अन्तिम छलफल गरिरहेका छन्। नेताहरुसँग छलफल गर्नुअघि अध्यक्ष यादवले प्रधानमन्त्री केपी शर्मा ओली र त्यसअघि कांग्रेस सभापति शेरबहादुर देउवासँग छलफल गरेका थिए ।

सरकारले माघ १८ गते प्रतिनिधिसभामा ६ वटा अध्यादेश पेश गरेको थियो।

प्रतिनिधिसभामा सत्तारुढ दल कांग्रेस-एमालेको बहुमत छ। तर, राष्ट्रिय सभामा सत्तारुढ दलको बहुमत छैन। त्यसकारण जसपाका तीन सांसद अध्यादेश पासका लागि निर्णायक भएका छन् ।

जसपालाई जसरी भएपनि फकाएर अध्यादेश पारित गराउने एमाले कांग्रेसको रणनीति रहेको छ । जसपालाई सरकारमा सहभागी गराउने आश्वासनसहित ओली देउवाले यादवलाई फकाएका छन् ।