काठमाडौं । राष्ट्रियसभाबाट पारित हुने या नहुने निश्चित नभएपछि सरकारले आज संसद बैठकमा अध्यादेशलाई निर्णायार्थ पेश नगर्ने भएको छ ।
यसअघि आजैको बैठकबाट ६ वटा अध्यादेशहरु निर्णायार्थ पेश गर्नेगरी कार्यसूची बनेको थियो ।
तर राष्ट्रियसभामा निर्णायक मानिएको दल जनता समाजवादी पार्टी नेपालसँग थप छलफल बाँकी रहेको भन्दै सरकार अध्यादेश निर्णायार्थ पेश गर्ने कार्यसूचीबाट पछि हटेको हो । कानुन न्याय तथा संसदीय मामिलामन्त्री अजय चौरसियाले सभामुख देवराज घिमिरे र राष्ट्रियसभाका अध्यक्ष नारायणप्रसाद दाहाललाई भेटेर अध्यादेश निर्णायार्थ पेश नगर्ने प्रधानमन्त्रीको सन्देश सुनाएका छन् ।
प्रधानमन्त्री केपी शर्मा ओली र कांग्रेस सभापति शेरबहादुर देउवाले जसपा नेपालका अध्यक्ष उपेन्द्र यादवसँग आजै छलफल गरेका थिए । तर छलफलमा लेनदेनको कुरा टुंगिन बाँकी रहेको छ । जसपा नेपालले मधेशको मुख्यमन्त्री पाउनुपर्ने दाबी गरेको छ ।
प्रतिनिधिसभामा सत्तापक्षको बहुमत रहे पनि राष्ट्रियसभामा सत्तापक्ष अल्पमतमा रहेको छ । जसपा नेपालको समर्थनविना राष्ट्रियसभाबाट अध्यादेश पारित हुन सम्भव देखिँदैन ।
प्रतिक्रिया