बुटवल । बुटवल उपमहानगरपालिकाले आफ्नो ६६औँ स्थापना दिवस धुमधामका साथ मनाएको छ । आज बुटवल स्थित उपमहानगरपालिका परिषरमा एक समारोह गर्दै बुटवल उपमहानगरको स्थापना दिवस मनाएको हो ।
स्थापना दिवस समारोहमा आइपुगेका संघीय सरकारका उपप्रधानमन्त्री एवम् सहरी विकास मन्त्री प्रकाशमान सिंहले संघीयताको मूल भावना अनुसार संघ, प्रदेश र स्थानीय तीनै तहको सरकारलाई पूर्ण अधिकार सम्पन्न बनाउन सरकार लागिरहेको बताए । सिंहले संघीयता बलियो बनाउन र संविधान कार्यान्वयनका लागि आवश्यक संशोधन र ऐन बनाउनका लागि नै अहिले संसद्का दुई ठुला दल मिलेर अहिले सरकार बनेको बताए ।
‘राजनीतिक स्थिरताको जनचाहना पूरा गर्न समयको आवश्यकता अनुसार संसद्का दुई ठुला दल मिलेर सरकार बनेको छ । कुर्सीमा जानका लागि मात्र अहिलेको सरकार बनेको होइन,’ उनले भने, ‘संघीयताको मूल भावना अनुसार तीनै तहको सरकारलाई पूर्ण अधिकार सम्पन्न बनाउन सरकार लागिरहेको छ । राजनीतिक स्थिरता र आर्थिक समृद्धिका लागि सरकार लागेको छ ।’
त्यस्तै, उपप्रधानमन्त्री सिंहले अब सहरहरूको विकास गर्दा नागरिकलाई चाहिने न्यूनतम सुविधा दिन सक्नुपर्ने भन्दै नागरिकको जीवन सहज बनाउने गरि सहरलाई अघि बढाउनुपर्ने बताए । बुटवल पहिलेबाटै आर्थिक गतिविधिको केन्द्रका रूपका रहेको भन्दै धार्मिक पर्यटनका लागि पनि प्रचुर सम्भावना रहेको उनको भनाइ थियो ।
उपप्रधानमन्त्री सिंहले बुटवलको दीर्घकालीन विकासका विशेष योजना ल्याउन आग्रह गरे ।
उनले बुटवल बुद्धको जन्मभूमि भएको क्षेत्र भएको उल्लेख गर्दै यहाँ पर्यटन क्षेत्रबाटै समृद्धि ल्याउन सकिने बताए । उनले नयाँ अवको योजना बनाउँदा नागरिकलाई सुविधामै विशेष ध्यान दिन आग्रह गरे । ‘बुटवल उपमहानगर त्यसै बनेको होइन, अब नयाँ ढंगले काम गर्ने योजना बनाउनुस् ।’ उनले भने ।
उपप्रधानमन्त्री सिंहले बुटवललाई महानगरतर्फ लैजाने क्राइटेरिया पुग्दै गएकाले त्यसमा ध्यान दिन पनि आग्रह गरे ।
लुम्बिनी प्रदेशका पूर्वमन्त्री भोजप्रसाद श्रेष्ठले बुटवलको विकासमा सबैको सहकार्य हुनुपर्नेमा जोड दिए । उनले सुकुम्वासी र अव्यवस्थित बसोबासी समस्या समाधानका लागि सरकारले कानुन निर्माण गरेर अघि बढ्न खोजेको र यसले बुटवलको समस्या समाधान हुने विश्वास व्यक्त गरे ।
विराटनगर महानगरपालिका प्रमुख नागेश कोइरालाले नगरको विकास र समृद्धि तथा नागरिकका अधिकारका लागि सहमति र सहकार्य महत्वपूर्ण रहेको बताए ।
बुटवल उपमहानगरपालिका प्रमुख खेलराज पाण्डेयले बुटवलको विकास र समृद्धिका लागि सबैबाट सहयोगको अपेक्षा गरेको बताए ।
कार्यक्रममा नगरको समग्र विकासमा योगदान दिएका विभिन्न क्षेत्रका अगुवा, अभियन्ता, टोल विकास संस्थाहरुलाई सम्मान गरिएको थियो ।
बुटवल उपमहानगरपालिकाको खेलकुद क्षेत्रको विकासमा पत्रकारिताका माध्यमबाट पुर्याएको योगदान गरेको भन्दै खबरकुराका सम्पादक दिनेश कुमार श्रेष्ठ सहित विभिन्न सञ्चार गृह र सञ्चारकर्मीहरुलाई सम्मान गरिएको थियो । कार्यक्रममा विभिन्न जातजाती र संस्कृति झल्कने झाकीहरु समेत प्रस्तुत गरिएको थियो ।
प्रतिक्रिया