प्रमुख तीन दलका शीर्ष नेताको बैठक बस्दै

काठमाडौं । आज सोमबार प्रमुख तीन दलका शीर्ष नेताहरूको बैठक बस्दैछ।

प्रधानमन्त्री कार्यालयमा अपरान्ह बस्ने बैठकमा संक्रमणकालीन न्यायसम्बन्धी विषयमा छलफल हुनेछ । प्रधानमन्त्री केपी शर्मा ओली, कांग्रेस सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डबीच बस्ने बैठकमा सत्य निरूपण तथा मेलमिलाप आयोग र बेपत्ता पारिएका व्यक्तिको छानबिन आयोगका पदाधिकारी नियुक्ति सिफारिस सम्बन्धमा छलफल हुनेछ ।

संक्रमणकालीन न्यायसम्बन्धी कानुन बने पनि कार्यान्वयनका लागि आवश्यक आयोगको पदाधिकारीको नियुक्ति हुन सकेको छैनन् । यसअघि आयोगका पदाधिकारी नियुक्ति सिफारिसका लागि सर्च कमिटी गठन गरिए पनि सो समितिले छनौट गर्न सकेको थिएन । प्रधानमन्त्री केपी शर्मा ओलीले अग्नि खरेललाई आफ्नो संक्रमणकालीन न्यायसम्बन्धी सल्लाहकार नियुक्त गरेपछि यो प्रक्रियाले पुनः गति लिन थालेको हो । यसअघि खरेलले शीर्ष नेताहरूसँग छलफल गरेका थिए ।