माछा मार्न गएकी दिक्षिकाको राप्ती नदीमा डुबेर मृत्यु

नेपालगन्ज । बाँकेको राप्ती नदीमा डुबेर माछा मार्न गएकी एक युवतीको मृत्यु भएको छ । राप्तीसोनारी गाउँपालिका(३ स्थित सिनावासस्थित राप्ती नदीमा माछा मार्ने क्रममा डुबेर आज स्थानीय १८ वर्षीय दिक्षिका चौधरीको मृत्यु भएको हो ।

राप्ती सोनारी गाउँपालिका वडा नम्बर ३ का वडाध्यक्ष मीनकुमार चौधरीका अनुसार गाउँकै अन्य महिलाहरुसँग राप्ती नदीमा माछा मार्ने क्रममा दिक्षिकाको नदीमा डुबेर मृत्यु भएको हो । दिक्षिकासँगै माछा मार्न गएका ११ जना महिलाहरुको भने उद्दार गरिएको वडाअध्यक्ष चौधरीले बताए ।

दिक्षिकाको शवलाई नदीबाट १ घन्टापछि स्थानीय र प्रहरीको सहयोगमा निकालिएको थियो । मृतक दिक्षिकाको शवलाई पोष्टमार्टमको लागि भेरी अस्पताल नेपालगन्ज पठाइएको प्रहरीले जनाएको छ ।