काठमाडौं ।
काठमाडौँ । शिक्षकहरूले लगातार विभिन्न माग राखेर आन्दोलन गरिरहेका बेला संघीय सरकारकी शिक्षामन्त्री विद्या भट्टराईले राजीनामा दिएकी छन् । मन्त्री भट्टराईले सोमबार प्रधानमन्त्री केपी शर्मा ओलीलाई भेटेर राजीनामा बुझाएकी हुन् ।
मन्त्री भट्टराईले प्रधानमन्त्रीलाई राजीनामा बुझाएको उनको निजी सचिवालयले जानकारी दिएको छ । शिक्षक आन्दोलनको विषयमा प्रधानमन्त्री र शिक्षामन्त्री भट्टराईबीच विवाद रहँदै आएको थियो । विद्यालय शिक्षा विधेयकका बिवषमा प्रधानमन्त्रीले दिनेगरेको अभिब्यक्तिलाई लिएर भट्टराईले असमति प्रकट गर्दै आएकी थिइन् । प्रधानमन्त्रीले बेलाबखत नीजि विद्यालयको पक्षपोषण हुने गरि अभिब्यक्ति दिने गरेको भन्दै शिक्षामन्त्री भट्टराईले असन्तुष्टि व्यक्त गरेकी थिइन्।
उनले संविधानले निःशुल्क शिक्षाको व्यवस्था गरेको भएपनि प्रधानमन्त्रीले त्यस विरुद्ध नीजि बिद्यालयमा लगानी सुरक्षित गर्ने खालका अभिब्यक्ति दिएको भन्दै पार्टीको आन्तरिक बैठकमा समेत असन्तुष्टि जनाएको पार्टीका एक नेताले बताए ।
मन्त्री भट्टराईले आन्दोलनकारी शिक्षकहरूसँग भेटघाट गर्दै शिक्षा विधेयक संसदीय समितिमा दफावार छलफल हुँदै गरेको र यसलाई चाँडै टुङ्ग्याउन आफू प्रतिबद्ध रहँदै आएको बताएकी थिइन् ।
शिक्षकहरू लगातार सडक आन्दोलनमा रहेको बेला उनले राजीनामा दिएकी हुन् । आजै केहीबेरपछि मन्त्रिपरिषद् बैठक पनि बस्दैछ । सम्भवतः आजकै मन्त्रिपरिषद्बाट उनको राजीनामा स्वीकृत हुनेछ ।
शिक्षक महासंघसँग बारम्बार संवाद भइरहेको छ तर निचोड निस्कन सकेको छैन । शिक्षक आन्दोलनकै कारण घेराबन्दीमा परेकी मन्त्री भट्टराईले प्रधानमन्त्री ओलीलाई राजीनामा पत्र बुझाएकी हुन् ।
प्रतिक्रिया