बुटवल । एमाले निकट अनेरास्वियुका एक नेताले विद्यार्थीको परीक्षा फारमको रकम हिनामिना गरेको भन्दै बुटवल बहुमुखी क्याम्पसले ती विद्यार्थी नेतालाई क्याम्पस प्रवेशमा निषेध गरेको छ । बुटवल बहुमुखी क्याम्पस बीए चौथो वर्षमा अध्ययनरत विवेक कुँवरले १२ जनाभन्दा धेरै विद्यार्थीसँग रकम लिएर पनि परीक्षा फारम नभरिदिएको भन्दै क्याम्पस प्रशासनले कुँवरलाई क्याम्पस प्रवेश निषेध गरेको हो ।
बुटवल बहुमुखी क्याम्पसका निर्वतमान स्ववीयु सदस्य समेत रहेका कुँवरविरुद्ध इलाका प्रहरी कार्यालयमा ठाडो उजुरी परेसँगै उनलाई क्याम्पस प्रशासनले कारवाही गरेको हो । उनी नेकपा एमाले निकट अनेरास्ववियुबाट स्ववीयु सदस्यमा निर्वाचित भएका थिए ।
क्याम्पसले वैशाख १९ गते निकालेको एक सूचनामा विभिन्न विद्यार्थीहरूसँग कुँवरले कागजपत्र तथा रकम लिएका तर फारम नभरिदिएको उल्लेख छ । कुँवरले विद्यार्थीहरूको प्रथम वर्षमा भर्नाका लागि पैसा अन्य कागजपत्र लगेको तर भर्ना पनि नगरेको तथा पैसा फिर्ता पनि नगरेको पाइएको इलाका प्रहरी कार्यालय बुटवलका डीएसपी इन्द्र बहादुर रानाले बताए ।
बुटवल बहुमुखी क्याम्पस प्रमुख डा। अरुण कुमार क्षेत्रीले बीए चौथो वर्षमा अध्ययनरत ९–१० जना विद्यार्थीबाट घटनाको पुष्टी भएपछि कुँवरलाई निलम्बन गरिएको बताए ।
क्याम्पस प्रमुख डा. अरुण कुमार क्षत्रीले बैशाख १९ गते जारी गरेको सूचनामा भनिएको छ, “उजुरी प्रमाणित भएकाले निज विद्यार्थीलाई क्याम्पसबाट निलम्बन गरी क्याम्पस प्रवेशमा समेत रोक लगाइएको छ ।” साथै सूचनामा क्याम्पसका सबै विद्यार्थीलाई भर्ना तथा परीक्षा फारमसम्बन्धी काम आफूले नै बैंक तथा लेखा शाखाबाट गराउन पनि आग्रह गरिएको छ । अन्य व्यक्तिमार्फत कार्य गराएमा त्यसको जिम्मेवारी क्याम्पस प्रशासनले नलिने समेत उनले स्पष्ट पारेका छन् ।
उनी आबद्ध विद्यार्थी संगठन अनेरास्ववियु रुपन्देही जिल्ला कमिटीले उनलाई निलम्बन गरेको जनाएको छ । संगठनका विरोधी गतिविधिमा संलग्न भएको आरोपसहित कुँवरलाई साधारण सदस्यबाट समेत निलम्बन गरिएको अनेरास्ववियुका जिल्ला अध्यक्ष भरत अर्यालद्वारा जारी विज्ञप्तिमा उल्लेख छ ।
प्रतिक्रिया