काठमाडौं । बढुवा र अनिवार्य अवकासका कारण खाली भएका ६ वटा प्रदेश प्रहरी कार्यालयसहित केन्द्रीय अनुसन्धान ब्यूरो (सीआईबी)मा प्रहरी नायब महानिरीक्षक (डीआईजी)हरूको सरुवा गरिएको छ । नेपाल प्रहरीका ६ प्रदेशका प्रहरी प्रमुख र केन्द्रीय अनुसन्धान ब्यूरो (सीआईबी) मा डिआईजीहरुको सरुवा गरिएको हो । गृह मन्त्रालयमा आइतबार बसेको गृहमन्त्रीस्तरीय बैठकले प्रहरी नायब महानिरीक्षक (डीआईजी)हरूको सरूवा गरेको हो ।
प्रहरी प्रधान कार्यालय मानवस्रोत विकास विभागले जारी गरेको सूचना अनुसार, कोशी प्रदेशमा ईश्वर कार्की, मधेशमा उमा प्रसाद चतुर्वेदी, बागमतीमा अरुण पौडेल, गण्डकीमा दिनेश कुमार आचार्य, लुम्बिनीमा राजेन्द्र प्रसाद भट्ट र सुदूरपश्चिममा डम्बर बहादुर विकलाई सरुवा गरिएको छ ।
त्यस्तै, केन्द्रीय अनुसन्धान ब्यूरो (सीआईबी) मा नेपाल प्रहरी प्रधान कार्यालय प्रदेश समन्वय विभागमा कार्यरत प्रहरी नायव महानिरीक्षक गोविन्द थपलियालाई सरुवा गरिएको छ ।
गण्डकी प्रदेश प्रहरी कार्यालयबाट डीआईजी भोलाबहादुर रावल र सुदूरपश्चिम प्रहरी कार्यालयबाट डीआईजी गणेश चन्दको अनिवार्य अवकास भएपछि खाली भएको थियो भने बाँके अन्य स्थानका डीआईजीहरुको अतिरिक्त प्रहरी महानिरीक्षक(एआईजी)मा बढुवा भएपछि खाली भएको थियो ।
प्रतिक्रिया