मानवअधिकार आयोगले भन्यो – उत्तेजना फैलाउने खालको प्रधानमन्त्रीको अभिव्यक्ति चिन्ताजनक

काठमाडौं । राष्ट्रिय मानव अधिकार आयोगले प्रधानमन्त्री केपी शर्मा ओलीलाई समाजमा उत्तेजना फैलाउने अभिव्यक्ति नदिन सचेत गराएको छ ।

प्रधानमन्त्री ओलीले हिजो जेठ १५ गते काठमाडौंमा एमालेको नियन्त्रण हुनुपर्छ भन्दै दिएको अभिव्यक्ति चिन्ताजनक रहेको उल्लेख गर्दै आयोगले त्यस्ता उत्तेजित अभिव्यक्ति नदिन भनेको हो । सोमबार आयोगका प्रवक्ता एवं सहसचिव टीकाराम पोखरेलले विज्ञप्ति जारी गर्दै भनेका छन्, ‘शान्तिपूर्ण तवरबाट विचार र अभिव्यक्ति राख्न नेपालको संविधान र कानूनले निषेध गरेको छैन। यस परिस्थितिमा अरूको विचार, अभिव्यक्ति र प्रदर्शनप्रति लक्षित गरी प्रधानमन्त्रीबाट आएको उक्त अभिव्यक्ति चिन्ताजनक छ ।’

जेठ १५ गते नवराज सुवेदी नेतृत्वको राजावादीहरुले सुरु गर्न लागेको आन्दोलनप्रति लक्षित गर्दै ओलीले सो दिन काठमाडौं एमालेको कब्जामा हुनुपर्ने अभिव्यक्ति दिएका थिए । आयोगको विज्ञप्तिमा, ‘जुनसुकै व्यक्ति, समूह र पार्टीलाई आफ्नो विचार र अभिव्यक्तिको स्वतन्त्रता भए पनि अरूप्रति लक्षित गरी मूठभेड निम्तिन सक्ने गरी उत्तेजनापूर्ण अभिव्यक्ति आउनु मानव अधिकारका मूल्यमान्यताको समेत विपरीत हुन जान्छ।’ उल्लेख गरिएको छ ।

राजधानी लगायतका क्षेत्रमा शान्ति सुरक्षालाई मजबुत बनाउन सुरक्षा निकायलाई आग्रह गर्दै आयोगले अभिव्यक्ति दिँदा संयमित हुन, नकारात्मक टीकाटिप्पणी नगर्न सबैलाई सुझाव समेत दिएको छ ।