काठमाडौं । नेपाली कांग्रेसका नेता मोहम्मद अफताव आलमलाई सफाइ दिने उच्च अदालत जनकपुरको वीरगञ्ज इजालासका न्यायाधीश खुसी प्रसाद थारूलाई कालो मोसो छ्यापिएको छ ।
नेकपा बहुमत (धर्मेन्द्र बास्तोला) नेतृत्वका कार्यकर्ताले बिहीबार न्यायाधीश थारूमाथि इजलासमै मोसो छ्यापेका हुन् । न्यायाधीशलाई कालो मोसो छ्याप्ने ३ जनालाई नियन्त्रणमा लिइएको जिल्ला प्रहरी कार्यालय पर्साका प्रमुख, एसपी गौतम मिश्रले जानकारी दिए ।
न्यायाधीश थारू र अर्जुन महर्जनको इजलासले जेठ १४ गते आलमलाई सफाइ दिने निर्णय गरेको थियो । २०६४ सालको निर्वाचनको पूर्वसन्ध्यामा भएको बम विस्फोटको घटनामा घाइते भएकालाई इँटा भट्टामा हालेर जलाएको आरोपमा आलम पक्राउ परेका थिए ।
जिल्ला अदालत रौतहटको आदेशले पुर्पक्षका लागि कारागारमा रहेका आलमलाई उच्च अदालतले सफाइ दिएको थियो । सफाइ दिएलगत्तै रिहा भएका आलम मष्तिष्कघात भएर अस्पताल भर्ना भएका थिए । आलमलाई सफाइ दिने न्यायाधीश थारू र महर्जन विवादमा परेका थिए । उनीहरूविरुद्ध न्याय परिषद्मा उजुरी समेत परेको छ ।
प्रतिक्रिया