गोप्य फोटो भिडियो बनाई बार्गेनिङ गर्ने २ जना पक्राउ

संखुवासभा । व्यक्तिगत गोपनिय फोटो र भिडियो बनाएर बार्गेनिङ गर्ने २ जनालाई प्रहरीले पक्राउ गरेको छ । व्यक्तिगत प्रयोजनका लागि खिचिएको गोपनिय फोटो र भिडियोहरु आफन्तको पठाउने तथा भिडियोमा रहेका ब्यक्तिसँग बार्गेनिङ गरेको अभियोगमा संखुवासभा प्रहरीले २ जनालाई पक्राउ गरेको हो ।

पक्राउ पर्नेहरुमा भोपुर षडानन्द नगरपालिका १ का २९ वर्षिय सुजन भुजेल र सोही स्थानका २१ वर्षिय बिपल राई रहेका छन् । प्रहरीका अनुसार उनीहरुले स्थानीय एक महिलाको व्यक्तिगत फोटो र भिडियो बनाई आफन्त र साथीहरुकोमा पठाउने तथा भिडियामा देखिएका पात्रहरुको मेसेन्जरमा पठाइदिने धम्की दिएर डर त्रास देखाउने गरेको पीडितको उजुरीको आधारमा पक्राउ गरिएको हो । दुबैजनालाई खाँदवारी नगरपालिका १ बाट पक्राउ गरिएको प्रहरीले जनाएको छ ।

पक्राउ परेका दुबैजनालाई जिल्ला अदालत चैनपुरबाट म्याद थप गरि अपराधिक लाभ तथा विद्युतिय अपराध कसुरमा अनुसन्धान सुरु गरिएको जिल्ला प्रहरी कार्यालय संखुवासभाका सूचना अधिकारी प्रहरी निरीक्षक अभिषेक कुमार श्रेष्ठले बताए ।