काठमाडौं । अमेरिकी राष्ट्रपति डोनाल्ड ट्रम्पले सोमबार ऐतिहासिक घोषणा गर्दै इजरायल र इरान पूर्ण युद्धविरामका लागि सहमत भएको घोषणा गरेका छन् । युद्धविराम सम्झौता आगामी ६ घण्टा पछिबाट सुरु भएर १२ घण्टाभित्रै चरणबद्ध रूपमा कार्यान्वयनमा आउने ट्रम्पले बताएको सीएनएनले जनाएको छ ।
“इजरायल र इरानबीच पूर्णरूपमा सहमति भएको छ । अबको लगभग ६ घण्टापछि इजरायल र इरानले आफ्ना अन्तिम मिसनहरू समाप्त गर्नेछन् र त्यसपछि १२ घण्टासम्म पूर्ण युद्धविराम हुनेछ । त्यस बिन्दुमा युद्ध समाप्त भएको मानिनेछ,” राष्ट्रपतिले सामाजिक सञ्जालमा लेखे ।
इरान र इजरायल दुवैले आगामी युद्धविरामबारे कुनै टिप्पणी गरेका छैनन् । ट्रम्पको पोस्ट अनुसार, युद्धविराम आगामी २४ घण्टामा चरणबद्धरूपमा लागु हुनेछ ।
“आधिकारिक रूपमा इरानले युद्धविराम सुरु गर्नेछ र १२ औँ घण्टामा इजरायलले युद्धविराम सुरु गर्नेछ । २४ औँ घण्टामा १२ दिने युद्धको आधिकारिक अन्त्यलाई विश्वले स्वागत गर्नेछ । प्रत्येक युद्धविरामको समयमा, अर्को पक्ष शान्त र सम्मानजनक रहनेछ,” ट्रम्पले पोष्टमा भनेका छन् ।
ट्रम्पको घोषणापछि फक्स न्यूजमा भएको अन्तर्वार्तामा बोल्दै उपराष्ट्रपति जेडी भान्सले ट्रम्पले सम्झौता अन्तिम विन्दुसम्म पुर्याएको भन्दै प्रशंसा गरेका छन् ।
“हामीले वास्तवमा त्यसमा काम गरिरहेका थियौँ, यो राम्रो समाचार हो । राष्ट्रपतिले त्यसलाई अन्तिम बिन्दुसम्म पुर्याउन सफल भए,” भान्सले भने ।
भान्सले ट्रम्पको पोस्टको मस्यौदा प्रसारणमा जानुभन्दा दुई मिनेटअघि पढेको बताए ।
“इरानसँग परमाणु हतियार बनाउने क्षमता छैन । हामीले त्यसका उपकरणहरू नष्ट गरिदियौँ,” भान्सले थपे ।
यसैबीच, ट्रम्पले पत्रकारहरूलाई सम्बोधन गर्दै इजरायल र इरान दुवै पक्षसँग प्रत्यक्ष संवाद गरेको र उनीहरू पूर्ण युद्धविरामका लागि सहमत भएको बताए । यो सहमति शान्ति स्थापनातर्फको ठूलो कदम भएको उनले बताए ।
ट्रम्प प्रशासनले इरान र इजरायल दुवै देशसँग गोप्य वार्ता गर्दै आएको थियो । पछिल्ला महिनाहरूमा सिरियाली भूमिमा इजरायली आक्रमण, इरानी मिलिसिया गतिविधि र लेबनानी सीमामा तनाव बढेको सन्दर्भमा यो घोषणा विशेष महत्वपूर्ण मानिएको छ ।
युद्धविराम कार्यान्वयन प्रक्रिया :
ट्रम्पले बताएअनुसार युद्धविराम लागु हुने प्रक्रिया २४ घण्टामा चरणबद्ध रूपमा अघि बढ्नेछ । जसमा पहिलो चरणमा आक्रमणहरू रोक्ने, दोस्रो चरणमा सैन्य सञ्जाल हटाउने र अन्ततः निरीक्षण संयन्त्र स्थापना गर्ने योजना छ ।
यस युद्धविरामले मध्यपूर्वको अस्थिरता घटाउने आशा गरिएको छ । यद्यपि, इरान र इजरायल दुवै सरकारबाट औपचारिक वक्तव्य आउन बाँकी छ ।
प्रतिक्रिया र प्रभाव :
संयुक्त राष्ट्रसंघ, युरोपेली संघ र अरब लिगले ट्रम्पको पहललाई स्वागत गर्दै शान्तिको दिशामा कदम चालिएको बताएका छन् ।
यो घटनाले ट्रम्पलाई अन्तर्राष्ट्रिय कूटनीतिक सफलता दिलाउनसक्ने अनुमान गरिएको छ । विशेषगरी उनले पुनः राष्ट्रपतिको उमेदवारी दिने चर्चा भइरहेका बेला यस्तो घोषणाले ठूलो राजनीतिक प्रभाव पार्ने देखिन्छ । सीएनएन
प्रतिक्रिया