एसिसी पुरुष यु-१६ : नेपालले भुटानलाई दियो ३५९ रनको विशाल लक्ष्य, रौनक श्रीवस्तवले बनाए १६८ रन

काठमाडौं । एसिसी पुरुष यु-१६ पूर्वी क्षेत्रीय क्रिकेट प्रतियोगिताको समूह चरणको आफ्नो अन्तिम खेलमा नेपालले भुटानलाई ३ सय ५९ रनको लक्ष्य दिएको छ ।

टस जितर पहिले ब्याटिङ गरेको नेपालले पाँच विकेटको क्षतिमा ३ सय ५८ रन बनाएको हो । नेपालका लागि रौनक श्रीवस्तवले १ सय ३२ बलमा १ सय ६८ रनको पारी खेले । उनले १६ चौका र ५ छक्का प्रहार गरे ।

यस्तै जोय थापाले ६७ बलमा ६१ रनको योगदान दिए । शिवान्शं बजगाईंले ५२ बलमा ५४ रन बनाएका थिए । यता भुटानका लागि संजय दोर्जेले ३ तथा तेन्जिन लोडेले १ विकेट लिएका छन् ।

नेपाल खेलेका तीनै खेलमा अपराजित छ । समूहको शीर्ष स्थानमा रहँदै नेपाल यसअघि नै सेमिफाइनल पुगिसकेको छ । यो समूहबाट सिंगापुर पनि सेमिफाइनल पुगिसकेको छ ।