खजुरा । बाँकेको खजुरामा पानीको प्राकृतिक बहाव रोकिने गरि गाउँपालिकाले बसपार्क निर्माण थालेपछि सयौं हेक्टर जमिन डुबानमा परेका छन् । सदियौं वर्षबाट प्राकृतिकरुपमा बग्दै आएको पानीको वहावलाई छेक्ने गरि बसपार्क बनाउन थालिएपछि स्थानीयको जग्गा डुबानमा परेको हो ।
बसपार्क निर्माण गर्दा पानीको वहावलाई ध्यानमा राख्न भनिएपनि पालिकाका प्राबिधिकहरुले बेवास्ता गरेको जग्गा धनीहरुको गुनासो छ । कांग्रेस खजुराका सभापति समेत रहेका जग्गा धनी रमेश सिंजालीले प्राकृतिक वहावलाई रोकेर बसपार्क निर्माण गर्दा किसानको वर्षभरीको धान उत्पादन डुबेर नष्ट हुने बताए । उनले पालिकाका जनप्रतिनिधि र कर्मचारीलाई त्यस सम्बन्धमा सचेत गराइएपनि गम्भीरताका साथ नलिएको बताए । पर्खाल बनाउँदा वहावलाई बग्न दिन पर्खालमा पानी जाने बाटो राखिएपनि पर्खाल भित्र माटो पुरिदिएपछि पानीको वहाव रोकिएको उनले बताए ।
अर्का जग्गाधनी विजय बुढाथोकीले विकासका नाममा जनताको विनास गर्न नहुने बताए । उनले पानीको वहावलाई प्राकृतिकरुपमा बग्न दिनुपर्ने बताए । त्यस क्षेत्रको पानी वषौंदेखि अहिले बन्दै गरेको बसपार्क क्षेत्रहुँदै गडैचा नालामा जाने गरेको उल्लेख गर्दै उनले बसपार्क निर्माणको नााममा पानीको वहाव नै रोकिएको बताए ।
खजुरा गाँउपालिकाका अध्यक्ष डम्बर विक तुफानले पर्खालभित्रको माटो हटाएर वहाव खोल्न ठेकेदार कम्पनीलाई आग्रह गरिएको बताए । पर्खाल निर्माण गर्दा पानी बग्ने स्थान राखिएको जनाउँदै उनले कम्पाउण्ड भित्र माटो पटान भएकाले पानीको वहाव रोकिएको बताए ।
प्रतिक्रिया