काठमाडौं । नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल प्रचण्डले देशमा बढ्दो भ्रष्टाचारप्रति तीव्र असन्तोष व्यक्त गर्दै सडक संघर्षको चेतावनी दिएका छन् ।
ललितपुरको बालकुमारी चौर, सुनाकोठीमा आयोजित ‘श्रम र उत्पादनमा वाइसिएल अभियान’को उद्घाटन गर्दै उनले सरकारले भ्रष्टाचार नियन्त्रण गर्न असफल भएको भन्दै अब जनस्तरबाटै दबाब सिर्जना गर्नुपर्ने बताए ।
“यदि सरकार यसरी नै भ्रष्टाचारमा लिप्त रहिरह्यो भने, हामी बाध्य भएर छिट्टै सडकबाटै आन्दोलन गरेर हटाउनु पर्ने हुन्छ”, प्रचण्डको चेतावनी थियो । संसदमा प्रतिपक्षको हैसियतले निरन्तर रूपमा भ्रष्ट्राचारको विरोध गर्दै आएको उल्लेख गर्दै उनले युवालाई पनि यस अभियानमा अग्रसर हुन आह्वान गरे ।
उनले वाइसिएल नेपालले सुरु गरेको श्रम र उत्पादन अभियानलाई पार्टीको ‘उत्पादन ब्रिगेड’ को निरन्तरता भएको उल्लेख गरे । कार्यक्रममा सहभागी हुँदै प्रचण्डले स्वयंसेवकहरूसँग इँटा बोक्ने, घाँस काट्ने, वृक्षारोपण गर्ने, र चौर सरसफाइ जस्ता कार्यमा प्रत्यक्ष श्रम पनि गरे ।
कार्यक्रममा माओवादी केन्द्रका सयौं युवाको उपस्थिति थियो भने वाइसिएलले देशभर ५५ स्थानबाट अभियानको एकैसाथ सुरुवात गरेको जानकारी दिइएको थियो ।
प्रचण्डले युवालाई उत्पादन, समृद्धि र स्वाभिमानी अर्थतन्त्र निर्माणको अग्रपंक्तिमा उभिन प्रेरित गर्दै भने, “यो अभियान माओवादी आन्दोलनको वैचारिक र व्यवहारिक गहिराइसँग जोडिएको विषय हो ।”
प्रतिक्रिया