गौर हत्याकाण्डको अनुसन्धान अघि बढाउन सर्वोच्चको परमादेश

काठमाडौं । सर्वोच्च अदालतले १९ वर्षअघिको गौर हत्याकाण्डको अनुसन्धान अघि बढाउन परमादेश जारी गरेको छ।

न्यायाधीशद्वय तिलप्रसाद श्रेष्ठ र नित्यानन्द पाण्डेयको इजलासबाट हत्याकाण्डको अनुसन्धान अघि बढाउन परमादेश जारी भएको हो । यससँगै २८ जनाको ज्यान जाने गरी भएको त्यो घटनाको अनुसन्धान र अभियोजन प्रक्रिया अघि बढ्ने भएको हो।

२०६३ चैत ७ गते रौतहटको गौरमा तत्कालिन नेकपा (माओवादी)का कार्यकर्तामाथि मधेसी जनअधिकार फोरमका कार्यकर्ताले अन्धाधुन्ध आक्रमण गर्दा २८ माओवादी कार्यकर्ताको हत्या भएको थियो ।

सर्वोच्चले परमादेश जारी गरेपछि पूर्वमाओवादी नेता एवं आम जनता पार्टीका अध्यक्ष सांसद प्रभु साहले न्यायको जीत भएको प्रतिक्रिया दिएका छन् । उनले सामाजिक सञ्जालमार्फत भनेका छन् लामो समयदेखि न्यायको प्रतीक्षामा रहेका पीडितहरूमा आशा पलाएको छ। शीघ्र न्याय सुनिश्चित भई दोषीहरू कानुनको दायरामा आउने विश्वास लिएको छु।”