दाङ । लुम्बिनी प्रदेशसभा सदस्य सरिता पुनको असामयिक निधनप्रति प्रदेशका मुख्यमन्त्री चेतनारायण आचार्यले गहिरो दुःख व्यक्त गरेका छन् ।
रुकुम पूर्व, पुथा उत्तरगंगा गाउँपालिका-१० तकसेरा बाछी गाउँकी पुनको भदौ १४ गते शनिबार काठमाडौंस्थित शिक्षण अस्पतालमा उपचारका क्रममा निधन भएको हो । केही दिनअघि पुनले दुईवटा शल्यक्रिया गरेकी थिइन् । पहिलो शल्यक्रियामार्फत उनले छोरीलाई जन्म दिएकी थिइन् भने दोस्रो शल्यक्रियामार्फत उनको मुटुमा कृत्रिम भल्भ प्रत्यारोपण गरिएको थियो । तर, उपचारकै क्रममा उनको निधन भएको हो ।
मुख्यमन्त्री आचार्यले पुनको निधनले प्रदेश मात्र नभई समग्र नेपाली समाजलाई गहिरो दुःख भएको उल्लेख गरेका छन् । उनका अनुसार प्रदेशसभा सदस्यको हैसियतमा पुनले समाज परिवर्तन, सुशासन र जनताको आकांक्षा सम्बोधनमा महत्वपूर्ण भूमिका निर्वाह गरेकी थिइन् ।
‘उहाँ सधैं दुर्गमका जनताको दुःख-पीडा, माग र अपेक्षालाई उजागर गर्दै न्याय र समानताको पक्षमा दृढतापूर्वक आवाज उठाउँदै आउनुभएको थियो । उहाँको सरल जीवनशैली, जनमुखी सोच र निरन्तरको जनसेवा आज हामी सबैका लागि प्रेरणाको स्रोत बन्नेछ,’ मुख्यमन्त्री आचार्यद्वारा जारी वक्तव्यमा उल्लेख छ ।
उनले पुनको असामयिक निधनलाई लुम्बिनी प्रदेशले गुमाएको एक दूरदर्शी, इमानदार, अनुशासित, विकासप्रेमी र निष्ठावान जनप्रतिनिधिको रूपमा स्मरण गरेका छन् ।
प्रतिक्रिया