बुटवल । बुटवल उपमहानगरपालिकाका नगर प्रमुख खेलराज पाण्डेयले पछिल्लो समय शिक्षामा गरिएको ठूलो लगानीका कारण बुटवल शैक्षिक हबको रूपमा विकास भएको बताएका छन् ।
बिहीबार बुटवल-११ देबिनगरस्थित नवीन औद्योगिक कद्दरबहादुर रीता माध्यमिक विद्यालयमा निर्माणाधीन नयाँ भवनको शिलान्यास गर्दै नगर प्रमुख पाण्डेयले शैक्षिक क्षेत्रमा देखिएको प्रगतिबारे प्रष्ट पारे । उनले भने, “गुणस्तरीय शिक्षा र सीपमूलक तालिमसहितको शैक्षिक वातावरण निर्माणमा बुटवलले अग्रता लिएको छ । यसकै परिणामस्वरूप यहाँका विद्यालयहरू विद्यार्थीको पहिलो रोजाइमा परेका छन् ।”
उनका अनुसार सीप र संस्कारसहितको गुणस्तरीय शिक्षा बुटवल उपमहानगरको मुलमन्त्र बनेको छ । “हामीले शिक्षालाई प्रविधि र सीपसँग जोडेर लैजाने नीति लिएका छौं । नेपालमै पहिलोपटक बुटवलले विद्यार्थीलाई ‘ओन द जब ट्रेनिङ’ (OJT) मा सहभागी गराउने योजना अघि सारेको छ, जसले विद्यार्थीलाई व्यवहारिक ज्ञान र सीप दुवै दिनेछ,” पाण्डेयले थपे ।
नगर प्रमुख पाण्डेयले यसअघि पनि विभिन्न कार्यक्रममा शिक्षामा लगानीलाई बुटवलको दीर्घकालीन प्राथमिकता रहेको बताएका थिए । उनका अनुसार बुटवललाई शैक्षिक राजधानीको रूपमा स्थापित गर्न नगरपालिकाले सामुदायिक विद्यालयमा आधारभूत पूर्वाधार, प्राविधिक शिक्षा र मानव संसाधन विकासमा निरन्तर ध्यान दिइरहेको छ ।
कार्यक्रममा वडा नं ११ का वडा अध्यक्ष रामचन्द्र क्षेत्रीले शिक्षामा लगानी बढाइएका कारण बाहिरी जिल्लाका विद्यार्थी पनि बुटवलमा अध्ययन गर्न आउने गरेको उल्लेख गरे । “गुणस्तरीय शिक्षा दिन सफल भएकै कारण सामुदायिक विद्यालयमा पनि भर्ना लिन समस्या हुने अवस्था आएको छ,” उनले बताए ।
विद्यालयका प्रधानाध्यापक प्रेमबहादुर बस्नेतले पर्याप्त कक्षाकोठाको अभावले विद्यार्थी भर्ना गर्न समस्या हुने गरेको भन्दै नयाँ भवन बनेपछि शिक्षण-अधिगम प्रक्रिया थप सहज र व्यवस्थित हुने विश्वास व्यक्त गरे ।
नवीन औद्योगिक कद्दरबहादुर रीता माध्यमिक विद्यालय बुटवलकै पुराना विद्यालयमध्ये एक हो । यस विद्यालयमा पछिल्लो समय प्राविधिक शिक्षा, विज्ञानतर्फको कक्षा, र अतिरिक्त गतिविधि सशक्त बनाउन स्थानीय तहको विशेष पहल हुँदै आएको छ ।
प्रतिक्रिया