काठमाडौँ । प्रधानमन्त्री सुशीला कार्कीबाट नियुक्त गरिएका ३ जना नवनियुक्त मन्त्रीहरुले राष्ट्रपति समक्ष शपथ लिएका छन् ।
भदौ २४ गतेको जेनजी प्रदर्शनका क्रममा आगजनी भएको शीतल निवासको प्राङ्गणमा नवनियुक्त मन्त्रीहरुले पद तथा गोपनियताको शपथ लिएका हुन् ।
शीतल निवासको प्राङ्गणमा टेन्ट टाँगेर शपथग्रहणका लागि तयार गरिएको मञ्चमा मन्त्रीहरुले शपथ लिएका हुन् । आज अर्थमन्त्रीका रूपमा रामेश्वर खनाल, ऊर्जामन्त्रीको रूपमा कुलमान घिसिङ र गृह र कानुन मन्त्रीका रूपमा ओमप्रकाश अर्यालको शपथ लिएका हुन् ।
यसअघि शुक्रबार प्रधानमन्त्री सुशीला कार्कीको शपथग्रहण कार्यक्रम भने शीतलनिवासभित्रको सानो कोठामा गरिएको थियो ।
शपथ ग्रहण कार्यक्रममा उपराष्ट्रपति रामसहाय प्रसाद यादव यादव, राष्ट्रियसभाका अध्यक्ष नारायणप्रसाद दाहाल, सर्वोच्च अदालतका प्रधानन्यायाधीश प्रकाशबहादुर राउत लगायतको उपस्थिती रहेको थियो ।
खनाल पूर्वअर्थ सचिव, घिसिङ नेपाल विद्युत् प्राधिकरणका पूर्वकार्यकारी निर्देशक र अर्याल अधिवक्ता हुन् । खनालले आर्थिक सुधार र सुशासनका क्षेत्रमा काम गर्दै आएका छन् भने घिसिङले प्राधिकरणको जिम्मेवारीबाट हटेपछि नागरिकका आवाज उठाउँदै आएका छन् । अधिवक्ता अर्यालले अख्तियार दुरुपयोग अनुसन्धान दुरुपयोगका तत्कालीन प्रमुख आयुक्त लोकमानसिंह कार्कीको नियुक्तिको अयोग्यतासम्बन्धी मुद्दामा पुनरावेदन हालेपछि चर्चामा आएका थिए ।
प्रतिक्रिया