काठमाडौं । नेपाली कांग्रेसका प्रवक्ता डा। प्रकाशशरण महतले पार्टी महामन्त्रीद्वय गगन थापा र विश्वप्रकाश शर्माप्रति आक्रोश पोखेका छन्।
पार्टी नेतृत्व परिवर्तनको माग गर्दै विशेष महाधिवेशन बोलाउनुपर्ने आवाज उठिरहेका बेला उनले आज बिहान आफ्नै जलेको निवासमा पत्रकार सम्मेलनमार्फत यस्तो प्रतिक्रिया दिएका हुन्।
डा। महतका अनुसार सभापति शेरबहादुर देउवाले लोकतन्त्रका लागि लामो संघर्ष गरेका र हालै त्रासदीपूर्ण आक्रमणको सामना गरेका अवस्थामा जिम्मेवार नेताहरूले संवेदनशीलता नदेखाउनु दु:खद छ। उनले भने, “घाउ पूर्ण रूपमा निको नभइसकेको बेलामा नेतृत्व परिवर्तनको बहस गर्नु भनेको घाउमाथि नुन छर्ने जस्तै हो। अहिलेको आवश्यकता भनेको एकता हो, कमजोरी पनि मिलेर मात्रै सुधार्न सकिन्छ।”
उनले हाल नेतृत्वविरुद्ध प्रश्न उठाइरहेका नेताहरू आक्रमण हुनुभन्दा केही दिनअघि मात्र सभापतिका नजिक रहेका स्मरण गराए। “२३ गतेभन्दा चार दिनअघिसम्म सभापति सबैभन्दा योग्य भन्ने यही नेताहरू थिए। हामी त बरु अलि टाढा देखिन्थ्यौं। तर अहिले नयाँ परिस्थिति बनेपछि एकैछिन पनि नपर्खी नेतृत्व परिवर्तनको कुरा उठाइयो,” उनले टिप्पणी गरे।
डा. महतले पार्टीमा भएको घटनाबारे मूल्यांकन गर्ने जिम्मेवारी केन्द्रीय समिति र संस्थागत संरचनाले लिने भन्दै घाइते सभापति पूर्ण रूपमा स्वस्थ नहुँदै टिप्पणी गर्नु उचित नहुने बताए। “नयाँ परिस्थिति बन्नेबित्तिकै अब एकछिन पनि हुँदैन भनेको के हो ? अभिभावकमाथि सांघातिक प्रहार हुँदा उपचार पनि नहुँदै आकाश नै झर्छ ? पार्टीको केन्द्रीय समिति छ, संरचना छ । कसरी भयो, किन भयो ? त्यसको मूल्यांकन पनि गर्छौं । तर त्यसको लागि पनि नपर्खिने ?”, उनले भने ।
प्रतिक्रिया