काठमाडौं । नेकपा (एमाले) केन्द्रीय कमिटीको बैठक दोस्रो दिन पनि जारी छ । बिहीबार बिहान ८ बजेदेखि सुरु भएको बैठकमा अध्यक्ष केपी शर्मा ओलीले प्रस्तुत गरेको विशेष प्रस्तावमाथि केन्द्रीय सदस्यहरूले आफ्नो धारणा र सुझाव राख्ने क्रम जारी छ ।
पार्टी प्रचार तथा प्रकाशन विभाग प्रमुख राजेन्द्र गौतमका अनुसार, बुधबारको बैठकमा ५० जना केन्द्रीय सदस्यले आफ्नो धारणा राखेका थिए। आज करिब १०० सदस्यले बोल्ने अनुमान गरिएको छ ।
बैठकमा प्रत्येक सदस्यलाई बोल्न तीन मिनेट समय दिइएको छ । तीन मिनेट नपुग्दै धारणा टुंग्याउन नसके स्वतः माइक काटिने व्यवस्था गरिएको छ। साथै, सदस्यहरूको पालो वर्णानुक्रम अनुसार तोकिएको छ ।
हिजोको बैठकमा अध्यक्ष ओलीले मंसिर २७ देखि २९ गतेसम्म पोखरामा पार्टीको ११ औं महाधिवेशन गर्ने प्रस्ताव गरेका थिए ।
केन्द्रीय सदस्यहरूको धारणा सुनेपछि पदाधिकारीहरूले पनि आफ्नो विचार प्रस्तुत गर्नेछन् । अन्त्यमा अध्यक्ष ओलीले बैठकमा उठेका सुझाव र जिज्ञासाहरूको एकमुष्ट जवाफ दिने तयारी रहेको एमालेले जनाएको छ ।
प्रतिक्रिया