काठमाडौं। नेपालस्थित पाकिस्तानी दूतावासले नेपाल–पाकिस्तान युवा परिषद् सँगको सहकार्यमा इलाम जिल्लाका माङसेबुङ र फाकफोकथुम गाउँपालिकाका बाढीपीडित परिवारलाई राहत सामग्री वितरण गरेको छ ।
गजुरमुखी धाम, माङसेबुङ गाउँपालिकामा आयोजित एक साधारण समारोहमा नेपालस्थित पाकिस्तानी राजदूत महामहिम अबरार एच हाश्मी, दूतावासका प्रथम सचिव मोहम्मद हारुन रसीद र नेपाल–पाकिस्तान युवा परिषद्का संयोजक ऋचुमणी लुइँटेलले प्रभावित परिवारलाई राहत सामग्री हस्तान्तरण गरे ।
कार्यक्रममा इलामकी प्रमुख जिल्ला अधिकारी सुनीता नेपाल, जिल्ला प्रहरी प्रमुख प्रहरी उपरीक्षक एकनारायण कोइराला, माङसेबुङ गाउँपालिकाका अध्यक्ष तथा स्थानीय प्रतिनिधिहरूको उपस्थिति रहेको थियो ।
कार्यक्रममा राजदूत हाश्मीले बाढीपीडितप्रति सहानुभूति प्रकट गर्दै नेपाल र पाकिस्तानबीचको मैत्रीपूर्ण सम्बन्ध अझ सुदृढ बनाउँदै लैजाने प्रतिबद्धता जनाए । उनले पाकिस्तानका जनताबाट प्रेमको प्रतीकस्वरूप राहत सामग्री हस्तान्तरण गरेको बताए । साथै उनले नेपाली जनताको दृढता र तीन तहका सरकारको राहत प्रयासको प्रशंसा गरे ।
सो अवसरमा राजदूत हाश्मीले इलामका बाढीपीडित विद्यार्थीहरूलाई सहयोग स्वरूप एमबीबीएस, बीडीएस, बी फार्मा कार्यक्रम र पाकिस्तान टेक्निकल असिस्टेन्स प्रोग्रामअन्तर्गत चारवटा छात्रवृत्ति र माध्यमिक तहका लागि पचासवटा छात्रवृत्ति प्रदान गर्ने विशेष घोषणा गरे ।
उनले हालैका बाढीपहिरोबाट प्रभावित कोशी प्रदेशका जनताप्रति पाकिस्तान सरकार र जनताको तर्फबाट गहिरो संवेदना प्रकट गरे ।
प्रतिक्रिया