काठमाडौं । नेपाली कांग्रेसका सभापति शेरबहादुर देउवा दम्पती सिंगापुरबाट काठमाडौँ फर्किएका छन् । सिंगापुरमा उपचार सकेर देउवा र आरजु राणा देउवा आज (शुक्रबार राति) काठमाडौँ आइपुगेका हुन्।
उनीहरू थप उपचारका लागि भन्दै कात्तिक १० गते सिंगापुर विमानमार्फत सिंगापुर गएका थिए। गत भदौ २४ गतेको जेनजी आन्दोलनको क्रममा देउवा दम्पती माथि उनीहरुकै निवास बूढानीलकण्ठमा आन्दोलनकारीहरुले कुटपिट गरेका थिए ।
उनीहरुलाई स्वागत गर्न कार्यवाहक सभापति पूर्णबहादुर खड्का, प्रवक्ता डा प्रकाशशरण महत, तरुण दलका नेतालगायत विमानस्थल पुगेका थिए। यसअघि खादा र मालाले गलाभरिने गरेपनि यसपटक सामान्य एउटा खादाले मात्र देउवा दम्पत्तीको स्वागत गरिएको थियो ।
आक्रमणबाट गम्भीर घाइते भएका देउवाको टाउकाको पछाडि भागमा चोट लागे १२ वटा टाँका लगाएको कांग्रेस नेताहरूले बताएका थिए। पार्टीमा उपसभापति पूर्णबहादुर खड्कालाई कार्यवाहक दिएर देउवा उपचारका लागि सिंगापुर उँडेका थिए।
देउवाको निवासबाट रुपैयाँको गड्डी जलेको अवस्थामा फेला परेको सामाजिक सञ्जालमा सार्वजनिक भएपछि सम्पत्ती सुद्धिकरण कार्यालयले उनीहरुमाथि अनुसन्धान गरिरहेको छ ।
वर्तमान अन्तरिम सरकारले देउवासहितको पासपोर्ट रोक्का गर्ने र काठमाडौँ बाहिर जाँदा अनुमति लिनुपर्ने निर्णय गरेपनि देउवा उपचारको लागि विदेश जाने भन्ने जानकारी पाएपछि उनका लागि सरकारले उक्त व्यवस्था फुकुवा गरिदिएको थियो।
आज पनि सिंगापुर विमानमार्फत नै उनीहरु स्वदेश फर्किएका हुन्।
प्रतिक्रिया