काठमाडौं । चालु आर्थिक वर्षको पहिलो तीन महिनामा विदेशबाट नेपाल आएको रेमिट्यान्स रकम ५ खर्ब ५३ अर्ब ३१ करोड पुगेको छ। यो रकम गत आर्थिक वर्षको सोही अवधिको तुलनामा ३५.४ प्रतिशतले बढी हो।
राष्ट्र बैंकका अनुसार गत आर्थिक वर्षको पहिलो तीन महिनामा रेमिट्यान्स आप्रवाह ११.९ प्रतिशतले मात्र बढेको थियो। चालु वर्षको असोज महिनामा मात्रै २ खर्ब १ अर्ब २२ करोड रुपैयाँ रेमिट्यान्स भित्रिएको छ, जसले विगतको असोजमा आएको १ खर्ब ४४ अर्ब १७ करोड रकमलाई उल्लेखनीय रूपमा उछिनेको छ।
उता, समीक्षा अवधिमा अमेरिकी डलरमा रेमिट्यान्स आप्रवाह पनि २९.२ प्रतिशतले बढेर ३ अर्ब ९४ करोड पुगेको राष्ट्र बैंकले जनाएको छ। गत वर्ष यस्तो आप्रवाह १०.६ प्रतिशतले मात्र बढेको थियो।
वैदेशिक रोजगारीका लागि अन्तिम श्रम स्वीकृति लिने नेपालीको संख्या पनि बढेको छ। चालु आर्थिक वर्षको तीन महिनामा १ लाख २३ हजार ४५९ जनाले नयाँ (संस्थागत तथा व्यक्तिगत) श्रम स्वीकृति लिएका छन् भने ७७ हजार २ सय ५७ जनाले पुनः श्रम स्वीकृति प्राप्त गरेका छन्। गत वर्षको सोही अवधिमा यो संख्या क्रमशः १ लाख १० हजार ६ सय ५४ र ५९ हजार ९ सय ३८ थियो।
प्रतिक्रिया