नेपालगन्ज । बाँकेमा ५ वटा ज्यान मार्ने उद्योग र एक सार्वजनिक सम्पत्ती तोडफेडको मुद्दा चलेका फरार अभियुक्तलाई प्रहरीले पक्राउ गरेको छ । पछिल्लो घटनामा खुकुरी प्रहार गरी फरार भएका ती व्यक्तिलाई प्रहरीले सात महिनापछि पक्राउ गरेको हो ।
पक्राउ पर्नेमा समिर भनेर चिनिने सरोज विक्रम बिष्ट रहेका छन् । उनलाई जिल्ला प्रहरी कार्यालय बाँकेको टोलीले मंगलबार नेपालगञ्ज १२ बाट पक्राउ गरिएको बाँके प्रहरीले जनाएको छ ।
विष्टसहित तीन जनाको समूहले १५ चैत २०८१ मा एक युवकमाथि खुकुरी प्रहार गरेर फरार भएका थिए । खुकुरी प्रहार गरी फरार भएका राप्तीसोनारी गाउँपालिका-२ का बिष्टमाथि ज्यान मार्ने उद्योगको कसुरमा अनुसन्धान अघि बढाइएको बाँके प्रहरी प्रमुख एसपी अंगुर जिसीले बताए ।
प्रहरीका अनुसार पक्राउ परेका बिष्टविरुद्ध यसअघि ५ वटा ज्यान मार्ने उद्योग र एक सार्वजनिक सम्त्री तोडफोड सहित ६ वटा कसुरमा मुद्दा चलेको भेटिएको छ । ६ असार २०७६ मा इलाका प्रहरी कार्यालय कोहलपुरबाट ज्यान मार्ने उद्योगको कसुर, कोहलपुरबाटै २ माघ २०७६ मा सार्वजनिक सम्पत्ति तोडफोडको कसुरमा मुद्दा चलेको थियो ।
२ साउन २०७७ मा जिल्ला प्रहरी कार्यालय बाँकेबाट ज्यान मार्ने उद्योगको कसुर, ७ माघ २०७७ मा अर्को ज्यान मार्ने उद्योगको कसुर, २० चैत २८० मा ज्यान मार्ने उद्योगको कसुर र २८ असार २०८१ मा बाँकेबाटै ज्यान मार्ने उद्योगको कसुरमा मुद्दा चलेको थियो ।
प्रतिक्रिया