काठमाडौं । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ ले नेपालको शान्ति, समावेशी लोकतन्त्र र सामाजिक रुपान्तरणमा विस्तृत शान्ति सम्झौताले खेलेको भूमिकालाई स्मरण गरेका छन्।
नेपाली राजनीतिमा ऐतिहासिक मोड मानिने विस्तृत शान्ति सम्झौता (सीपीए) भएको १९ वर्ष पूरा भएको अवसरमा प्रचण्डले उक्त स्मरण गरेका हुन् ।
प्रचण्डले आज जारी गरेको वक्तव्यमा जनयुद्धका क्रममा गरिएका बलिदानले नै मुलुकलाई राजतन्त्रको अन्त्य, संघीय लोकतान्त्रिक गणतन्त्रको स्थापना, सामाजिक समानता र समावेशी संविधान निर्माणतर्फ अघि बढाएको उल्लेख गरेका छन्। शहीद, बेपत्ता, घाइते, अपाङ्ग र जनयुद्धका पीडित परिवारप्रति उनले उच्च सम्मान व्यक्त गरेका छन्।
उनले शान्ति सम्झौताका बेला उठाइएका न्याय, समानता, सामाजिक रूपान्तरण र आर्थिक समुन्नतिको एजेन्डा अझै पूर्ण रूपमा कार्यान्वयन हुन नसकेको प्रष्ट पार्दै अहिले पनि तत्कालीन सहमति र प्रतिबद्धताअनुसार राज्य संरचना तथा कानुनी सुधारको आवश्यकता रहेको बताए।
प्रचण्डले आजको चुनौतीलाई समाधान गर्न सबै राजनीतिक शक्तिहरूबीच एकता र सहकार्य अपरिहार्य रहेको उल्लेख गर्दै, “शान्ति सम्झौताले मार्गनिर्देशन गरेको लोकतान्त्रिक समावेशी गणतन्त्रलाई सबल बनाउन नयाँ पुस्ताले अग्रभूमिकाबाट जिम्मेवारी वहन गर्नुपर्छ” भनेका छन्।
उनले भ्रष्टाचारविरुद्धको लडाइँ, सुशासन, आर्थिक समानता, प्रदेश र स्थानीय तहको सुदृढता तथा संविधानको पूर्ण कार्यान्वयनलाई ‘नयाँ जनजी’ युवापुस्ताको मुख्य कार्यभारका रूपमा व्याख्या गरेका छन्।
वर्तमान राजनीतिक दलसम्बन्धी बहस, असन्तुष्टि र द्विविधाको माहोलमा उनले आफ्नै पार्टीले शान्ति सम्झौताका ध्येय–उद्देश्यलाई पूरा गर्दै राजनीतिक स्वामित्व र जिम्मेवारीमा दृढ रहने प्रतिबद्धता प्रकट गरेका छन्।
प्रचण्डले शान्ति प्रक्रियालाई संस्थागत गर्दै मुलुकलाई स्थायी शान्ति, स्थिरता र समुन्नतितर्फ लैजान सबैपक्षीय एकता र सहकार्यका लागि अपील गरेका छन्।
प्रतिक्रिया