नेपालगन्ज । सहकारी वित्तीय संस्था लिमिटेड, नेपालगन्जका बचतकर्ताहरुले अदालतको आदेश कार्यान्वयनको माग राख्दै आमरणसहित रिले अनसन सुरु गरेका छन् । जिल्ला प्रशासन कार्यालय, बाँकेको मुख्य प्रवेशद्वार अगाडि सहकारीका पीडितहरु मध्यबाट ५ जनाले आमरण तथा रिले अनसन सुरु गरेका हुन् ।
अनशन सुरु गरेका मध्य एक जना आमरण अनशनमा र अन्य ४ जनाले रिले अनसनमा बसेका छन् । नेपालगन्जका पूर्व नगर प्रमुख समेत रहेका सहकारी पीडित संघर्ष समितिका संयोजक वरिष्ठ अधिवक्ता विजय गुप्ता आमरण अनसनमा बसेका छन् भने माया पासी, रामचन्द्र पासी, मोतिकुमारी पासी र गुग्धी यादव रिले अनसनमा बसेका छन् ।
आमरण अनसनसम्म आइपुगेका पीडितहरु ६ वर्षदेखि सडक आन्दोलन गर्दै आएका छन् । सहकारीमा ४३ करोडबढी अपचलन भएपछि २०७६ असोज २८ गते ४१ जनाविरुद्ध जिल्ला अदालतमा मुद्दा दायर गरिएको थियो । जिल्ला अदालतले २०८० पुस २६ गते १९ जनालाई कसुरदार ठहर गर्दै सजाँय सहित बिगो असुलीको आदेश गरेको थियो । जिल्लाको आदेशलाई उच्च अदालत तुलसीपुर नेपालगन्ज इजलासले समेत सदर गरिसकेको छ ।
अदालतले कसुरदारलाई कैद, जरिवाना र बिगो भराउने आदेश गरेको छ । त्यससँगै सहकारी डिभिजन, मन्त्रालय, जिल्ला प्रशासन, पीडितका प्रतिनिधि राखेर तदर्थ समिति बनाउन र विशेष साधारण सभा गरेर सहकारीलाई सञ्चालनमा ल्याउन भनिएको थियो । संघर्ष समितिका संयोजक गुप्ताले दुई महिनामा तदर्थ समिति बनाउनु भन्ने अदालतको आदेश कार्यान्वयन नभएकाले आमरण तथा रिले अनसन सुरु गरिएको जानकारी दिए । तदर्थ समिति हुँदै विशेष साधारण सभा गरेर सहकारी सञ्चालन गर्न सकिएमा उठाउन बाँकी कर्जा उठाउने, कसुरदारबाट बिगो भराउने र बचतकर्ताको रकम फिर्ता गर्दै जाने गुप्ताको भनाई छ ।
आमरण तथा रिले अनसन सुरु गर्नुअघि पीडितहरुले प्रमुख जिल्ला अधिकारी दिलकुमार तामाङमार्फत प्रधानमन्त्रीलाई ज्ञापन पत्र पठाएका थिए ।
ज्ञापनपत्र बुझे लगत्तै बाँकेका प्मुख जिल्ला अधिकारी दीलकुमार तामाङले जिल्ला प्रशासन कार्यालय, बाँकेले सहायक प्रमुख जिल्ला अधिकारी महेशकुमार गुरुङलाई सहजीकरणका लागि जिम्मेवारी तोकेका छन् । गुरुङले सहकारी विभागसँग समन्वय गरिरहेको र आज भोलीमै सहकारी विभागबाट मागको सुनुवाई हुने विश्वास व्यक्त गरे ।
जिल्लाको ठूलोमध्येको सहकारीमा ११ हजार ८ सय ४ जना बचतकर्ता रहेका छन् ।
प्रतिक्रिया