काठमाडौं । जेनजी आन्दोलनका क्रममा तोडफोड र आगजनीबाट क्षतिग्रस्त बुटवल उपमहानगरपालिकाको कार्यालय भवनको स्थलगत अवलोकन गर्न अर्थमन्त्री रामेश्वर खनाल बुटवल उपमहानगरपालिकामा पुगेका छन् ।
तोडफोड र आगजनीबाट क्षतिग्रस्त उपमहानगरपालिका कार्यालय भवनको स्थलगत अवलोकन गर्न पुगेका अर्थमन्त्री खनालले बिहिबार मात्र क्षतिग्रस्त कार्यालय भवन मर्मतसम्भार सम्बन्धी फाइल आफ्नो टेबुलमा आएको बताए । घटना भएको ३ महिना बढी भएपछि मात्र क्षतिको विवरण सहितको फायल मन्त्रीको टेवलमा पुगेको हो । उनले फाइल हेरेर आवश्यक निर्णय लिने बताउँदै भवन मर्मतका लागि संघीय सरकारले सहयोग गर्ने आश्वासन दिए ।
त्यसक्रममा क्षतिग्रस्त भवनका बिभिन्न कोठाहरु देखाउँदै बुटवल उपमहानगरपालिकाका नगर प्रमुख खेलराज पाण्डेयले सामान्य मर्मतले मात्रै कार्यालयको सेवा प्रवाह गर्न सम्भव नभएको जानकारी दिए । उनले पूर्ववत कार्यसम्पादनका लागि संघ सरकारको सहयोग जरुरी रहेको बताए ।
मेयर पाण्डेयले कार्यालय भवन पुनर्निर्माणका लागि ठूलो रकम आवश्यक पर्ने र उपमहानगरपालिकासँग त्यस्तो स्रोत नभएको उल्लेख गर्दै संघ सरकारबाट सहयोग गर्न माग गरेका हुन् ।
विकास योजनाका लागि छुट्टयाइएको बजेट कटौती नगरि स्थानीय सरकारको बजेटबाट पुननिर्माण सम्भव नभएको जनाउँदै नगर प्रमुख पाण्डेयले कार्यान्वयनमा गइसकेको योजना कटौती गर्दा समस्या आउने गुनासो गरे ।
जवाफमा अर्थमन्त्री खनालले संवेदनशील र कार्यान्वयनमा गइसकेका आयोजनाको बजेट कटौती नगरिएको जानकारी दिए ।
प्रतिक्रिया