सुनचाँदीको मूल्य अहिलेसम्मकै उच्च

काठमाडौं । सोमबार सुनचाँदीको मूल्यले अहिलेसम्मकै उच्च रेकर्ड कायम गरेको छ।

नेपाल सुनचाँदी व्यवसायी महासंघका अनुसार यस दिन सुनको मूल्य प्रतितोला २ लाख ६१ हजार ७ सय रुपैयाँ निर्धारण गरिएको छ।

यो मूल्य अघिल्लो दिनको तुलनामा ३ हजार ४ सय रुपैयाँले बढेको हो। यसअघि गत सोमबार प्रतितोला २ लाख ६० हजार ७ सय रुपैयाँ पुगेर सुनको भाउले नयाँ रेकर्ड बनाएको थियो, जुन ठीक एक सातामै फेरि तोडिएको हो।

चाँदीको मूल्य पनि लगातार नयाँ उचाइमा पुगेको छ। अघिल्लो दिनको तुलनामा प्रतितोला १३० रुपैयाँले वृद्धि हुँदै चाँदीको भाउ ४ हजार २३५ रुपैयाँ कायम भएको छ। यसअघि चाँदी प्रतितोला ४ हजार १०५ रुपैयाँमा कारोबार भएको थियो।