नवलपुरको मध्यबिन्दुमा बोरा भित्र महिलाको शव फेला, हत्या भएको आंशका

नवलपुर । नवलपुरको मध्यबिन्दु नगरपालिका ११ बाउन्ने कुनास्थित पूर्व–पश्चिम राजमार्गको कल्भट मुनि रहेको कुसुन्डे सिँचाइ नहरमा बोराभित्र एक महिलाको शव फेला परेको छ।

आज बिहान सेतो रङको ‘कृषि सामग्री कम्पनी लिमिटेड’ लेखिएको बोरा भित्र मानिसको शव रहेको सूचना प्राप्त भएपछि इलाका प्रहरी चौकी अरुणखोलाबाट प्रहरी टोली घटनास्थलमा खटिएको थियो। प्रहरी सहायक निरीक्षक भरत थापाको कमाण्डमा ४ जनाको टोली तत्काल घटनास्थल पुगेको प्रहरीले जनाएको छ।

प्रारम्भिक अवस्थामा शवको पहिचान खुल्न नसके पनि अनुसन्धानका क्रममा मृतक मध्यबिन्दु नगरपालिका–१० की करिब ३५ वर्षीया रिता मुसहर रहेको खुलेको छ। शव बोरा भित्र राखी नहरमा फालिएको अवस्थामा भेटिएकाले घटनालाई शंकास्पद मान्दै प्रहरीले हत्या भएको आशंकामा अनुसन्धान अघि बढाएको जनाएको छ।

घटनास्थल सुरक्षित गरी थप अनुसन्धान भइरहेको र घटनामा संलग्नको खोजी तीव्र पारिएको प्रहरीले जानकारी दिएको छ।