काठमाडौं । अन्ततः नेपाली कांग्रेसका महामन्त्री गगन थापा र विश्वप्रकाश शर्माले विशेष महाधिवेशन आह्वान गरेका छन् ।
महामन्त्रीद्वयले विज्ञप्ति जारी गरी पुष २७ र २८ गते काठमाडौंको भृकुटीमण्डपमा विशेष महाधिवेशन आयोजना गर्ने घोषणा गर्दै त्यसमा सहभागी बन्न सबै महाधिवेशन प्रतिनिधिहरुलाई आग्रह गरेका छन् ।
उनीहरुले विशेष महाधिवेशन सम्बन्धी मागलाई विधानसम्मत भएको दाबी गरेका छन् । ४० प्रतिशत भन्दा बढी प्रतिनधिले हस्ताक्षर गरेर माग गरेको विषयलाई अवहेलना गर्ने कुनै पनि सम्भावना विधानले परिकल्पना नगरेको उनीहरुले स्पष्ट पारेका छन्।
महामन्त्रीद्वयले भनेका छन्, “विधानअनुसार कारणसहित दिइएको निवेदनपछि विशेष महाधिवेशन नबोलाउन नसक्ने अवस्था कांग्रेसको विधानमा कल्पना गरिएको छैन। सो मागलाई असान्दर्भिक वा औचित्यहीन ठहर गर्ने अधिकार पनि कसैलाई प्राप्त छैन।”
थापा र शर्माले बहुमत महाधिवेशन प्रतिनिधिद्वारा गरिएको विशेष महाधिवेशनको माग वैधानिक र राजनीतिक दुवै दृष्टिले बाध्यकारी बनेको उल्लेख गरेका छन् ।
विधानअनुसार विशेष महाधिवेशन नबोलाइनु विधानको उल्लंघन र जिम्मेवारीप्रति उदासीनता हुने बताएका उनीहरूले राजनीतिक दलसम्बन्धी कानुनको पनि यो उल्लंघन हुने चेतावनी दिएका छन्।
महामन्त्रीद्वयले विशेष महाधिवेशनमा उपस्थित भई कार्यक्रमलाई व्यवस्थित र भव्य रूपमा सफल बनाउन सबैमहाधिवेशन प्रतिनिधिहरूलाई आह्वान गरेका छन्।
प्रतिक्रिया